Генэральны сакратар NATO пра напад Расеі на Ўкраіну: «Лукашэнка павінен спыніць любыя крокі па ўступленьні ў гэты незаконны канфлікт»

Генэральны сакратар NATO Енс Столтэнбэрг, 30 верасьня 2022
Генэральны сакратар NATO Енс Столтэнбэрг, 30 верасьня 2022

У NATO ня бачаць падрыхтоўкі Расеі да выкарыстаньня ядзернай зброі, але правядуць вучэньні па захадах стрымліваньня.

Генэральны сакратар NATO Енс Столтэнбэрг падкрэсьліў, што арганізацыя і яе чальцы будуць падтрымліваць Украіну ў вайне супраць расейскай агрэсіі столькі, колькі будзе патрэбна:

«Прэзыдэнт Пуцін распачаў гэтую вайну, і толькі ён павінен яе завяршыць, вывеўшы свае войскі з тэрыторыі Ўкраіны. Лукашэнка павінен спыніць любыя крокі па ўступленьні ў гэты незаконны канфлікт», — заявіў Генэральны сакратар Паўночнаатлянтычнага альянсу Енс Столтэнбэрг.

Генэральны сакратар Паўночнаатлянтычнага альянсу Енс Столтэнбэрг заявіў, што на наступным тыдні ў рамках NATO адбудуцца вучэньні па адпрацоўцы захадаў стрымліваньня.

«NATO гатовае да любой пагрозы, да любога нападу на любога хаўрусьніка арганізацыі. Менавіта таму альянс і існуе, каб стрымліваць у тым ліку і ядзерныя ўдары. Гэта было важна да нападу на Ўкраіну, пасьля нападу — яшчэ важней, у тым ліку і ў сілу той ядзернай рыторыкі, якую мы чуем ад прэзыдэнта Пуціна і Расеі», — сказаў Енс Столтэнбэрг на прэсавай канфэрэнцыі ў Брусэлі.

Генэральны сакратар NATO лічыць гэтую рыторыку Расеі небясьпечнай.

«Расея ведае, што перамагчы ў ядзернай вайне немагчыма, пачынаць яе ня варта. Мы дакладна данесьлі да Расеі, што наступствы будуць самыя сур’ёзныя, калі Расея выкарыстае ядзерную зброю ў любым кантэксьце, у тым ліку ва Ўкраіне», — паведаміў ён.

Енс Столтэнбэрг дадаў, што NATO пакуль ня бачыць прыкмет, што Расея рыхтуецца да прымяненьня ядзернай зброі, але захоўвае пільнасьць і правядзе плянавыя вучэньні, каб адпрацаваць захады стрымліваньня.

​
XS
SM
MD
LG