Лінкі ўнівэрсальнага доступу

У Расеі заявілі, што чакаюць ад Лукашэнкі прызнаньня незалежнасьці Абхазіі


Налепка з надпісам «Расея — акупант» на грузінскай вуліцы
Налепка з надпісам «Расея — акупант» на грузінскай вуліцы

Уладзімір Пуцін не абмяркоўваў з Аляксандрам Лукашэнкам падчас перамоваў у Сочы прызнаньне Беларусьсю Абхазіі. Пра гэта заявіў журналістам прэс-сакратар расейскага кіраўніка Дзьмітрый Пяскоў.

Пяскоў адзначыў, што аб прызнаньні Крыму ў гэтым кантэксьце гаворкі таксама не ішло. Пры гэтым ён падкрэсьліў, што ў Крамлі разьлічваюць, што «беларускія таварышы» своечасова прымуць «адпаведнае рашэньне». Пяскова цытуе РИА Новости.

У жніўні 2008 году пасьля вайны паміж Расеяй і Грузіяй і зьяўленьня дзьвюх самаабвешчаных рэспублік — Паўднёвай Асэтыі і Абхазіі — Лукашэнка сустракаўся зь іх кіраўнікамі ў Сочы. Аднак у выніку Беларусь так і не прызнала незалежнасьць гэтых рэспублік.

28 верасьня 2022 году ён без папярэдняга анонсу прыехаў у Абхазію і сустрэўся з кіраўніком самаабвешчанай Абхазіі Асланам Бжанія.

У сувязі зь візытам Лукашэнкі ў Абхазію ў МЗС Грузіі выклікалі амбасадара Беларусі ў гэтай краіне Анатоля Ліса. Ад яго запатрабавалі тлумачэньняў. Тбілісі заклікаў Менск паважаць сувэрэнітэт і тэрытарыяльную цэласнасьць Грузіі ў яе прызнаных межах і не рабіць дзеяньняў, якія супярэчаць прынцыпам міжнароднага права.

Прэзыдэнтка Грузіі Саломэ Зурабішвілі выказала абурэньне візытам Лукашэнкі. Яна абвінаваціла яго ў парушэньні двухбаковых адносін і міжнароднага права.

Абхазія — рэспубліка з насельніцтвам прыблізна 245 тысяч чалавек у складзе Грузіі. У 2008 годзе падчас жнівеньскай вайны Абхазію разам з Паўднёвай Асэтыяй акупавала Расея, на акупаваных тэрыторыях мясцовыя прамаскоўскія ўлады абвясьцілі незалежнасьць сваіх рэспублік.

Аднак незалежнасьць Абхазіі прызналі толькі пяць краін ва ўсім сьвеце: Расея, Сырыя, Вэнэсуэла, Науру, Нікарагуа. Тыя ж дзяржавы прызналі і 57-тысячную Паўднёвую Асэтыю. Ваенную агрэсію Расеі і яе мясцовых калябарантаў асудзілі на міжнародным узроўні.

У жніўні 2021 году Лукашэнка расказаў, чаму не прызнаў Паўднёвую Асэтыю і Абхазію. Паводле яго слоў, Захад пагражаў Менску дадатковымі санкцыямі ў выпадку прызнаньня незалежнасьці гэтых самаабвешчаных рэспублік, Масква ж адмовілася кампэнсаваць эканамічныя страты. Пры гэтым Лукашэнка тады назваў «нядобрым фактам» падзею, «калі Асэтыю адарвалі ад Грузіі».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG