Кабінэт заявіў, што цяпер «вельмі шмат залежыць ад хуткасьці прыняцьця рашэньняў і рашучасьці нашых сумесных дзеяньняў па падтрымцы Ўкраіны і адстойваньні незалежнасьці Беларусі».
«Сёньня Міжнародны дзень міру, і пуцінская Расія жадала б, каб ён увайшоў у гісторыю як дзень „рускага міру“. Пра гэта б марылі ў звар’яцелай ад крыві Расеі. Пра гэта б марыў і прарасейскі рэжым крамлёўскай марыянэткі Лукашэнкі. Гарматнае мяса і ядзерныя грыбы — такім у сваёй хворай сьвядомасьці яны ўяўляюць рэцэпт перамогі.
Але гэтага ня здарыцца. Сёньняшні дзень ня зьменіць хаду гісторыі. Гучныя заявы кіраўніка крыважэрнай імпэрыі не адменяць яе паразы і падзеньня. Гучныя заявы не адменяць перамогу Ўкраіны, яны не адменяць падтрымку Ўкраіны з боку ўсяго цывілізаванага сьвету, якая няўхільна расьце.
Аб’яднаны пераходны кабінэт Беларусі патрабуе і будзе дабівацца безумоўнага вываду ўзброеных сіл Расейскай Фэдэрацыі з тэрыторыі Беларусі. Дзеяньні краіны-агрэсара Расеі і марыянэткавага рэжыму Лукашэнкі ўяўляюць для Беларусі прамую пагрозу страты незалежнасьці і сувэрэнітэту», — гаворыцца ў заяве.
Кабінэт, сярод іншага, прапанаваў:
- Уступаць у шэрагі беларускіх добраахвотнікаў ва Ўкраіне і ў плян «Перамога»;
- Сабатаваць любыя віды мабілізацыі, абвешчанай Лукашэнкам, у тым ліку ў сфэры эканомікі;
- Ажыцьцяўляць любыя дзеяньні, накіраваныя на барацьбу з расейскімі акупантамі, падтрымку Ўкраіны і адхіленьне рэжыму Лукашэнкі ад улады.
Што такое Аб’яднаны пераходны кабінэт Беларусі
На канфэрэнцыі «Новая Беларусь» у Вільні 9–10 жніўня Сьвятлана Ціханоўская заявіла аб стварэньні Аб'яднанага пераходнага кабінэту, які будзе працаваць на галоўныя мэты:
- Абараняць незалежнасьць і сувэрэнітэт Рэспублікі Беларусь, прадстаўляць нацыянальныя інтарэсы Беларусі. Ажыцьцявіць фактычную дэакупацыю Беларусі.
- Аднавіць канстытуцыйную законнасьць і правапарадак.
- Распрацаваць і рэалізаваць меры па спыненьні незаконнага ўтрыманьня ўлады, забясьпечыць транзыт улады ад дыктатуры да дэмакратыі, стварыць умовы для правядзеньня сумленных і свабодных выбараў.
- Распрацоўваць і выконваць рашэньні, неабходныя для дасягненьня дэмакратычных перамен у Беларусі.
- І ў выніку гэтага павінны быць вызваленыя ўсе палітвязьні.
Гэтага патрабавалі ад яе многія іншыя апазыцыйныя фігуры.
У складзе Кабінэту, сярод іншых, працуюць:
- Павал Латушка — прадстаўнік Кабінэту па транзыце ўлады;
- Аляксандар Азараў — па аднаўленьні правапарадку;
- Валер Кавалеўскі — па замежных справах;
- Валер Сахашчык — па абароне і нацыянальнай бясьпецы;
- Аліна Коўшык — прадстаўніца па нацыянальным адраджэньні.
