Лінкі ўнівэрсальнага доступу

Коміка Максіма Галкіна прызналі ў Расеі «замежным агентам». Ён адказаў: «Я гандлем сумленьнем не займаюся»


Максім Галкін
Максім Галкін

Міністэрства юстыцыі Расеі ўнесла артыста, шоўмэна і коміка Максіма Галкіна ў сьпіс фізычных асоб, якія выконваюць функцыю так званых «замежных агентаў».

З паведамленьня Мінюста РФ вынікае, што расейскія ўлады лічаць, нібыта Галкін займаецца палітычнай дзейнасьцю, атрымліваючы за гэта грошы з Украіны.

Максім Галкін, камэнтуючы рашэньне ведамства ў Інстаграме, заявіў: «Замежны агент дык замежны агент. Я да замежных агентаў сябе не адношу».

Падставу для ўнясеньня яго ў рэестар Галкін назваў надуманай:

«Па-першае, я не займаюся палітычнай дзейнасьцю. Са сцэны на сваіх канцэртах я займаюся гумарыстычным жанрам, палітычнай сатырай . Калі я зьвяртаюся да сваіх падпісантаў ці гледачоў па-за жанрам, як грамадзянін, як чалавек, я гэта раблю абсалютна шчыра. Шчыра і застаючыся сумленным перад самім сабой. Міністэрства юстыцыі, шчырасьць і сумленнасьць не аплачваецца ў прыстойных людзей, да якіх я, спадзяюся, адношуся. Я не прадаю сваё меркаваньне і свае думкі і не купляю чужыя. Я гандлем сумленьнем не займаюся», – заявіў артыст.

Ён дадаў, што грошы з Украіны апошні раз атрымліваў «гадоў дзесяць таму», калі даваў там канцэрты і падкрэсьліў, што не зьбіраецца адмаўляцца ад гумару «ва ўгоду палітычнай кан'юнктуры».

Зь першых дзён ваеннага ўварваньня ва Ўкраіну Максім Галкін выступаў з асуджэньнем вайны. Акрамя таго, ён паведаміў, што плянуе даць канцэрты ў Ізраілі, зьбіраючы дапамогу ўкраінскім уцекачам.

Пасьля пачатку поўнамаштабнага ўварваньня Расеі ва Ўкраіну ў лютым 2022 году Максім Галкін з жонкай, сьпявачкай Алай Пугачовай, і дзецьмі зьехаў у Ізраіль. Пазьней Пугачова зь дзецьмі вярнуліся ў Расею, Галкін застаецца за мяжой.

У пачатку верасьня прэс-сакратар Уладзіміра Пуціна Дзьмітры Пяскоў заявіў, што Галкін «рабіў вельмі дрэнныя заявы» і «яму відавочна з намі не па дарозе».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG