Лінкі ўнівэрсальнага доступу

Брытанская выведка ацаніла пагрозу Ўкраіне ад вучэньняў Беларусі па «вызваленьні тэрыторый»


Камандна-штабное вучэньне Узброеных Сіл РБ на палігоне Брэсцкі. 9 верасьня 2022 году
Камандна-штабное вучэньне Узброеных Сіл РБ на палігоне Брэсцкі. 9 верасьня 2022 году

Выведка Вялікай Брытаніі лічыць малаімаверным, што новыя вайсковыя вучэньні ў Беларусі зьяўляюцца сьведчаньнем падрыхтоўкі да прамога ўдзелу ў вайне ва Ўкраіне.

«Хоць выкарыстаньне Расеяй беларускай тэрыторыі адыграла важную ролю ў няўдалым наступе Расеі на Кіеў у пачатку ўварваньня, беларускія сілы маюць абмежаваныя наступальныя магчымасьці, малаверагодна, што яны разгорнуць свае сілы ва Ўкраіне. Вельмі малаверагодна, што гэтыя вучэньні зьяўляюцца сьведчаньнем падрыхтоўкі да прамога ўдзелу Беларусі ў вайне ва Ўкраіне», — гаворыцца ў паведамленьні выведкі, якое апублікавала Мінабароны Вялікай Брытаніі 9 верасьня.

8 верасьня ў Беларусі пачалося чарговае камандна-штабное вучэньне Ўзброеных сіл, якое мае працягнуцца да 14 верасьня. На вучэньнях, сярод іншага, будуць адпрацоўваць «вядзеньне баявых (спэцыяльных) дзеяньняў у вызваленьні тэрыторыі, часова захопленай супернікам».

Ва Ўкраіне раней выказалі занепакоенасьць гэтымі вучэньнямі. Паводле прадстаўніка Генштабу УСУ Аляксея Громава, ня выключана, што пад «вызваленьнем тэрыторыі, часова захопленай супернікам» могуць мецца на ўвазе прымежныя раёны Валынскай, Ровенскай і Жытомірскай абласьцей, бо гэта, паводле яго, «адпавядае канцэпцыі сумесных дзеяньняў узброеных сіл так званай „саюзнай дзяржавы“ на ўкраінскім кірунку».

Украіна таксама пачала праводзіць вучэньні каля беларускай мяжы — ў Жытомірскай, Ровенскай і Валынскай абласьцях.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG