Лінкі ўнівэрсальнага доступу

23% жывуць за кошт дапамогі ад блізкіх, 41% заробку ідзе на ежу. Лічбы з жыцьця беларусаў


Глядзім, як жывуць грамадзяне Беларусі і на што трацяць грошы.

У вёсках 6,4% жывуць за рысай беднасьці

3,9% беларусаў маюць сярэднемесячны даход ніжэйшы за пражытковы мінімум. Бюджэт пражытковага мінімуму са жніўня гэтага году складае 328 рублёў 50 капеек. Гэта значыць, што гэтыя людзі жывуць за рысай беднасьці.

Інфаграфіка паводле Белстату
Інфаграфіка паводле Белстату

У вёсках такіх людзей 6,4%, у гарадах — 3,1%, падлічвае Белстат. Найбольш людзей з такім нізкім даходам жыве ў Магілёўскай вобласьці — 5,9%, а найменш у Менскай — 1,2%.

73% тратаў беларусаў — спажывецкія расходы

41,2% сваіх даходаў беларусы трацяць на харчаваньне, 31,5% — на нехарчовыя тавары. 24,7% даходаў ідзе на паслугі, зь іх 6,5% — гэта жыльлёва-камунальныя паслугі.

У 2021 годзе штомесячны даход на душу насельніцтва ў Беларусі складаў 907 рублёў 3 капейкі пры сярэднім заробку ў 1434,4 рубля.

Адкуль даходы ў беларусаў

65,1% даходаў беларусаў — гэта заробкі. 22,7% — трансфэры ці пераводы ад іншых асобаў, у тым ліку з-за мяжы.

7,8% даходаў беларусаў — гэта сродкі ад прадпрымальніцкай дзейнасьці. 2,6% — даходы ад маёмасьці, у тым ліку здача жыльля.

7% беларусаў дрэнна ацэньваюць стан свайго здароўя.

63,9% беларусаў ацэньваюць стан свайго здароўя як здавальняючы, 29,1% лічаць, што здароўе ў іх добрае, і 7% — што дрэннае.

7,6% жанчын ацэньваюць сваё здароўе як кепскае, 67,9% — як здавальняючае, і 24,5% — як добрае.

Сярод мужчын кепска сваё здароўе ацэньваюць 6,1%, добра яго ацэньваюць 36,1% мужчын, здавальняюча — 57,8%.

Пры гэтым у Беларусі зьніжаецца колькасьць лекараў: калі ў 2020-м іх было 43,1 тысячы, то ў 2021 годзе — 41,7 тысячы чалавек. Мінус 1,4 тысячы за год.

Беларускіх турыстаў стала менш у 1,5 раза

Згодна з статыстыкай, беларускія турысты менш сталі езьдзіць за мяжу. Калі ў 2018 годзе зь Беларусі ў іншыя краіны прыехаў 680 691 турыст, то ў 2021 годзе — толькі 426 436 арганізаваных турыстаў. Іх колькасьць за 4 гады зьменшылася ў 1,5 раза.

Гэтая статыстыка ня ўлічвае тых, хто выехаў у краіны СНД. Найбольш у 2021 годзе езьдзілі ў Эгіпет, Турэччыну, Аб’яднаныя Арабскія Эміраты, Польшчу, Грузію.

36 356 чалавек асудзілі ў 2021 годзе

У 2021 годзе ў Беларусі агулам асудзілі 36 356 чалавек. Агулам зарэгістравалі 87 696 злачынстваў. Годам раней злачынстваў зарэгістравалі на 7,7 тысячы менш.

Найбольш распаўсюджаныя злачынствы: крадзеж — 25 369 выпадкаў, злачынствы ў сфэры кампутарнай тэхнікі — 15,5 тысячы, махлярства — 4,7 тысячы, злачынствы, зьвязаныя з наркотыкамі — 4,7 тысячы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG