Пра гэта паведамляе казахская служба Радыё Свабода.
З такой ініцыятывай выступілі дэпутаты са сфармаванай у пачатку году групы «Жана Казахстан», якая аб’яднала ляяльных прэзыдэнту Касым-Жамарту Такаеву парлямэнтараў.
«Лічым няправільным, калі пры жыцьці чалавека яго імем называецца горад, да таго ж народ таксама не прыняў новую назву сталіцы. Таму будзе гістарычна справядлівым вярнуць ранейшую назву сталіцы — Астана, якая ў свой час была прапанавана першым прэзыдэнтам. Гэтае рашэньне будзе ўлічваць унёсак першага прэзыдэнта ў станаўленьне і разьвіцьцё галоўнага гораду краіны, а таксама будзе адпавядаць запытам і чаканьням грамадзянаў», — гаворыцца ў заяве дэпутатаў.
Перайменаваць Астану ў Нур-Султан 20 сакавіка 2019 года прапанаваў сам Такаеў — у дзень уступленьня на пасаду прэзыдэнта пасьля таго, як Нурсултан Назарбаеў склаў свае паўнамоцтвы і перадаў іх Такаеву. Датэрміновыя выбары прэзыдэнта ў Казахстане прайшлі 9 чэрвеня 2019 году.
«Лічу неабходным увекавечыць імя нашага вялікага сучасьніка — першага прэзыдэнта Рэспублікі Казахстан Нурсултана Абішэвіча Назарбаева. Наша сталіца павінная насіць імя нашага прэзыдэнта і называцца Нур-Султан», — сказаў тады Касым-Жомарт Такаеў.
Парлямэнт Казахстану ў той жа дзень адразу ў двух чытаньнях прагаласаваў за перайменаваньне.
