Лінкі ўнівэрсальнага доступу

Жыхары Гомельшчыны паведамілі пра начныя выбухі ў раёне аэрадрому «Зябраўка». У Міністэрстве абароны Беларусі пацьвердзілі здарэньне


Беларуска-расейскія вайсковыя вучэньні «Саюзная рашучасьць – 2022». 10 лютага 2022 году. Ілюстрацыйнае фота
Беларуска-расейскія вайсковыя вучэньні «Саюзная рашучасьць – 2022». 10 лютага 2022 году. Ілюстрацыйнае фота

Ноччу 10 жніўня тэлеграм-каналы «Беларускі Гаюн» і «Флагшток» з спасылкай на відавочцаў паведамілі пра выбухі і сполахі ў раёне вайсковага аэрадрому «Зябраўка»» каля Гомля. Пра «магутныя ўдары» гамельчукі расказалі і выданьню Zerkalo. 11 жніўня ў Міністэрстве абароны Беларусі пацьвердзілі факт.

«Інфармацыю пра сполахі пацьвярджаюць адразу некалькі крыніц. Па розных зьвестках, пачынаючы з 00.30 было ня менш за 8 выбліскаў», — напісаў а 23.42 10 жніўня тэлеграм-канал «Беларускі гаюн».

Гомельскі тэлеграм-канал «Флагшток» таксама ў ноч з 10 на 11 жніўня паведаміў, што ў кірунку аэрадрому «Зябраўка» «з 00.25 па 00.32 былі чутныя выбухі, адчувалася ўдарная хваля, пару разоў праз суцэльную воблачнасьць былі бачныя «сьветлавыя пробліскі».

Чытачы Zerkalo.io. паведамілі выданьню, што каля 00.30 у Гомлі чулі пяць магутных удараў, адчувалася ўдарная хваля. Таксама на «Гарачую лінію» выданьня напісала гамяльчанка, якая сьцьвярджала, што жыве ў цэнтры. Паводле яе, «выбліскаў, выбухаў і хваляў» ноччу ў Гомлі «ня чулі і ня бачылі».

Не было вядома, ці сполахі ў «Зябраўцы» зьвязаныя з вучэньнямі, якія паводле інфармацыі Міністэрства абароны Беларусі мелі праходзіць з 9 па 11 жніўня з выкарыстаньнем вайсковай і спэцыяльнай тэхнікі, авіяцыйных вайсковых частак, войскаў супрацьпаветранай абароны і радыётэхнічных войскаў.

Аднак раніцай 11 жніўня ў ведамстве пацьвердзілі факт здарэньня.

«У сувязі са зваротамі ў Міністэрства абароны пра сполахі на ўчастку мясцовасьці Зябраўка Гомельскай вобласьці, паведамляем, што 10 жніўня каля 23 гадзін падчас кантрольнага прабегу адной з адзінак тэхнікі пасьля праведзенай замены рухавіка адбылося яе загараньне. Асабовым складам своечасова прынятыя меры для тушэньня. Пацярпелых няма», — паведамляе ведамства.

Што вядома пра аэрадром «Зябраўка»?

Пра выкарыстаньне расейскімі войскамі вайсковага аэрадрому «Зябраўка» пад Гомлем стала вядома ў першыя дні вайны. Адтуль рэгулярна выляталі самалёты і гелікоптэры, запускалі ракеты па Ўкраіне.

Расейскія вайскоўцы засталіся на тэрыторыі «Зябраўкі» і пасьля адыходу расейцаў з поўначы Ўкраіны і часткова з тэрыторыі Беларусі на пачатку красавіка.

Ад «Зябраўкі» да тэрыторыі Ўкраіны, якую цяпер цалкам кантралюе ўрад у Кіеве, каля 50 кілямэтраў.

Гэтага больш чым дастаткова для ракетных удараў як старой савецкай зброяй кшталту комплексаў «Точка-У», так і новымі заходнімі сыстэмамі залпавага агню накшталт амэрыканскай HIMARS.

«Зябраўка» даволі блізка ад Гомля, густанаселены Навабеліцкі раён абласнога цэнтру ўсяго за дзесяць кілямэтраў ад вайсковага аэрадрому.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG