«На Валынскім і Палескім кірунках падразьдзяленьні Ўзброеных сіл Беларусі выконваюць задачу па ўзмацненьні аховы ўчастка беларуска-ўкраінскай мяжы ў Берасьцейскай і Гомельскай абласьцях. У падразьдзяленьнях сіл спэцыяльных апэрацый Узброеных сіл Беларусі прайшла праверка боегатоўнасьці», — гаворыцца ў ранішняй зводцы Генштабу. Іншых падрабязнасьцяў камандаваньне не паведаміла.
На мінулым тыдні Генштаб Узброеных сіл Украіны паведаміў, што ў Беларусі зноў падоўжылі тэрміны правядзеньня праверкі боегатоўнасьці ўзброеных сіл (цяпер да 6 жніўня) «з мэтай стрымліваньня дзеяньняў Сіл абароны».
Беларусь не зьяўляецца непасрэднай удзельніцай поўнамаштабнай вайны Расеі ва Ўкраіне, але аказвае матэрыяльна-тэхнічную падтрымку расейскаму ўварваньню, якое пачалося 24 лютага, калі некаторыя расейскія войскі ўвайшлі ва Ўкраіну празь беларускую мяжу.
