Сёлета за першае паўгодзьдзе грамадзкія працы былі прызначаныя ў якасьці адміністрацыйнага пакараньня ў дачыненьні да амаль 600 чалавек, паведаміў у інтэрвію парталу рravo.by судзьдзя Вярхоўнага суда Эдгар Марцірасян.
«У 2021 годзе гэта спагнаньне было ўжыта толькі ў дачыненьні 20 чалавек. Гэта было зьвязана з тым, што мясцовым органам улады спатрэбіўся нейкі час, каб паўнавартасна арганізаваць сваю працу ў гэтым кірунку. У выніку за першую палову 2022 году грамадзкія працы былі ўжытыя судамі ў дачыненьні да амаль 600 чалавек, а факты ўхіленьня ад яго выкананьня носяць на сёньня адзінкавы характар», — заявіў судзьдзя.
Часьцей за гэты тып пакараньня прызначалі за такія грубыя правапарушэньні, як дробны крадзеж, хатні гвалт і зьяўленьне ў грамадзкім месцы ў стане алькагольнага ап'яненьня.
Грамадзкія работы як від пакараньня ў Беларусі ўвялі больш за год таму. Іх асаблівасьць у тым, што суд можа ўжываць такія від пакараньня толькі са згоды самога правапарушальніка. Калі чалавек ухіляецца ад выкананьня грамадзкіх работ, закон прадугледжвае для яго штраф у значнай суме або адміністрацыйны арышт, патлумачыў Эдгар Марцірасян.
Паводле яго, агулам у 2021 годзе, у параўнаньні з 2020-ым, агульная колькасьць выпадкаў адміністрацыйных правапарушэньняў зьнізілася больш чым на 21 %.
Тым часам, паводле праваабаронцаў, з пачатку прэзыдэнцкай кампаніі 2020 году, у Беларусі ўзрасла колькасьць «палітычных» затрыманьняў, адміністрацыйных і крымінальных спраў. За гэты час, паводле «Вясны», завялі больш за 5500 крымінальных спраў, зьвязаных з пратэстамі супраць вынікаў прэзыдэнцкіх выбараў 2020 году. Па стане на канец ліпеня 2022 году вядома больш за 1 980 вынікаў такіх судоў, 1257 чалавек прызнаныя палітычнымі зьняволенымі. Таксама за гэты час былі заведзеныя тысячы адміністрацыйных палітычна матываваных спраў.
