Студэнту авіяакадэміі за перасыланьне зьвестак пра рух вайсковых самалётаў прысудзілі 2,5 года калёніі
Праваабарончы цэнтар «Вясна» паведамляе, што студэнта авіяакадэміі Аляксандра Загдая абвінавацілі паводле арт. 361-4 КК («Садзеяньне экстрэмісцкай дзейнасьці») за перасылку ў тэлеграм-каналы інфармацыі пра рух тэхнікі.
Загдая затрымалі ў чэрвені 2022-га. Яго зьмясьцілі ў СІЗА па абвінавачаньні ў тым, што ён «сыстэматычна перадаваў інфармацыю тэлеграм-каналу Nexta».
Разгляд справы Загдая праходзіў 19 і 22 ліпеня ў Берасьцейскім абласным судзе. Абвінавачаньне сьцьвярджала, што Аляксандар з 13 кастрычніка 2021 году па 17 сакавіка 2022 году перасылаў «нявызначаным асобам паведамленьні пра рух авіятэхнікі ў Баранавічах».
У выніку судзьдзя Валянціна Куніцкая пакарала хлопца 2 гадамі і 6 месяцамі зьняволеньня.
Актывіста з Наваполацку пасьля 45 дзён у ізалятары перазатрымалі па новым пратаколе
Паводле інфармацыі праваабаронцаў, Андрэй Галавырын перазатрыманы паводле чацьвёртага пратаколу — ён ня выйшаў на волю пасьля 45 дзён арышту, піша «Вясна». У панядзелак чакаецца чарговы суд над ім.
Андрэя Галавырына затрымалі 15 чэрвеня і зьмясьцілі ў Наваполацкі ЦІП. Вядома, што ў гэты ж дзень над ім адбыўся суд па арт. 19.11 КаАП за «распаўсюд экстрэмісцкіх матэрыялаў». Судзьдзя Зінаіда Балаболава прызнала яго вінаватым і арыштавала на 15 дзён. 1 ліпеня Андрэя зноў пакаралі 15-дзённым арыштам. Пасьля 30 дзён арышту яго зноў пакінулі за кратамі, а 15 ліпеня Галавырына трэці раз запар асудзілі на 15 сутак.
Яшчэ падчас першага арышту мужчына перанёс гіпэртанічны крыз.
Па якім артыкуле яго перазатрымалі гэтым разам — невядома.
Затрыманьні ў Пружанах
Праўладныя тэлеграм-каналы паведамляюць пра затрыманьне дырэктара швейнай фірмы Сяргея Вакульчыка. На «пакаяльным відэа» 45-гадовы мужчына кажа, што быў затрыманы за тое, што на сваёй старонцы ў «Одноклассниках» разьмясьціў фатаздымак з нацысцкай сымболікай. Паведамляецца, што Сяргею прызначылі 15 дзён арышту.
Таксама вядома пра затрыманьне былога сьледчага Максіма Куроўскага. Папярэдне, яго затрымалі за камэнтары ў інтэрнэце.
Паводле непацьверджанай інфармацыі, усяго ў Пружанах затрымана чатыры чалавекі, паведамляе «Вясна».
У Горадні проста пасярод вуліцы затрымалі менчука, які адбывае пакараньне ў горадзенскай ПУАТ № 24
Вядома, што раней затрыманага мужчыну асудзілі паводле ч. 1 арт. 130 КК («Распальваньне расавай, нацыянальнай, рэлігійнай альбо іншай сацыяльнай варожасьці») і арт. 186 КК («Пагроза забойствам, прычыненьнем цяжкіх цялесных пашкоджаньняў або зьнішчэньнем маёмасьці»).
Праваабаронцы мяркуюць, што гаворка ідзе пра 49-гадовага менчука Сьвятаслава Лепешава. Менскі гарадзкі суд 12 жніўня прысудзіў яму чатыры гады «хіміі» за пагрозу забойствам расейскаму прапагандысту Канстанціну Прыдыбайлу з RT і распальваньне нацыянальнай варожасьці ў адносінах да расейцаў.
Згодна з матэрыялам з праўладных тэлеграм-каналаў, быўшы на «хіміі», мужчына распаўсюдзіў у фэйсбуку «экстрэмісцкія» матэрыялы. На «пакаяльным» відэа ён прызнаўся ў гэтым.
Берасьцейца асудзілі на 2,5 года калёніі за тое, што хацеў стаць добраахвотнікам ва Ўкраіне
У Берасьцейскім абласным судзе адбыўся першы суд за «замах на ўдзел на тэрыторыі замежнай дзяржавы ў ваенных дзеяньнях» (ч. 1 арт. 14 і ч. 1 арт. 361-3 Крымінальнага кодэксу). Абвінавачаны — 37-гадовы жыхар Берасьця Сяргей Вайцюк. Гэта першы чалавек у Беларусі, якога асудзілі за тое, што хацеў стаць добраахвотнікам ва Ўкраіне пасьля 24 лютага 2022 году.
Згодна з вэрсіяй абвінавачваньня, Вайцюк у сярэдзіне красавіка адправіўся на таксі ў Маларыцкі раён, у памежную зону да дзяржаўнай мяжы Рэспублікі Беларусь з Украінай. Прыбыўшы на месца, ён спрабаваў перасекчы мяжу ў напрамку Ўкраіны, у тым ліку па-за ўстаноўленым пунктам пропуску, аднак не давёў свой намер да канца, бо яго затрымалі праваахоўныя органы.
Судзьдзя Сьвятлана Крамянёўская прызначыла яму 2,5 года калёніі ва ўмовах агульнага рэжыму — менавіта такога пакараньня прасіў пракурор Аляксандар Богуш.
Затрымалі былую выкладчыцу БНТУ
Затрыманая Сьняжана Рогач — магістарка гісторыі, былая выкладчыца БНТУ, паводле інфармацыі Беларускай Рады культуры, падстава затрыманьня — «абраза прадстаўніка ўлады».
У Віцебску затрымалі былую журналістку Tut.by Тацяну Мацьвееву
Мацьвееву затрымалі на віцебскім вакзале пасьля вяртаньня са службовай выправы. Перад гэтым ёй тэлефанавалі міліцыянты з прапановай «прыйсьці на размову», паведамляюць праваабаронцы.
Мінулым разам журналістку выклікалі ў міліцыю месяц таму. Як потым паведамляла Тацяна, прычына была ў тым, што Tut.by прызналі «экстрэмісцкай арганізацыяй».
«І вось у мяне амаль 2 гадзіны даведваліся, ці не супрацоўнічаю я зь ёю. На разьвітаньне сказалі: „Да новых сустрэч“», — расказала тады журналістка.
Магчыма, Тацьцяну затрымалі паводле арт. 24.23 КаАП («Парушэньне парадку арганізацыі або правядзеньня масавых акцыяў») за аватаркі ў сацсетках.
