За абразу Лукашэнкі ў Сьветлагорску асудзілі работніка «Хімвалакна»
У судзе Сьветлагорскага раёну 22 ліпеня вынесьлі прысуд у крымінальнай справе работніка «Хімвалакна» Алега Чычыкайлы, абвінавачанага ў абразе прэзыдэнта (ч. 1 арт. 368 Крымінальнага кодэксу).
Справу разглядала судзьдзя Галіна Гулевіч.
Аб затрыманьні мужчыны стала вядома 31 траўня, а 3 чэрвеня яго зьмясьцілі пад варту ў СІЗА-3 ў Гомлі.
Паводле матэрыялаў абвінавачаньня, Чычыкайла пакінуў у інтэрнэце камэнтар, які палічылі абразьлівым у дачыненьні да Лукашэнкі.
Судовыя пасяджэньні праходзілі ў будынку былога прафэсійнага ліцэю хімікаў, дзе часова разьмяшчаецца суд Сьветлагорскага раёну ў сувязі з рэканструкцыяй свайго будынка.
Праваабарончы цэнтар «Вясна» паведамляе, што суд абвінаваціў Чычыкайлу ў інкрымінаваных яму злачынствах і пакараў яго 1 годам 6 месяцамі калёніі.
У панядзелак 25 ліпеня ў сьветлагорскім судзе зноў пачнуць разгляд справы за абразу Лукашэнкі. На лаве падсудных будзе жыхарка Светлагорскага раёну Натальля Леановіч.
Палітзьняволеных сужэнцаў асудзілі на 3 гады «хатняй хіміі» за ўдзел у акцыях пратэсту
Учора, 21 ліпеня, у судзе Савецкага раёну Менску палітзьняволеных Санту Франчук і Ўладзімера Дальшова абвінавацілі ва ўдзеле ў трох эпізодах групавых дзеяньняў, якія груба парушаюць грамадзкі парадак (ч. 1 арт. 342 Крымінальнага кодэксу). Судзьдзя Вольга Емяльянчанка прысудзіла пары па тры гады абмежаваньня волі без накіраваньня ў папраўчую ўстанову адкрытага тыпу («хатняй хіміі») кожнаму. Іх вызвалілі ў залі суду.
Санта і Ўладзімер — праграмісты з Менску. 27 лютага на выбарчым участку сілавікі затрымалі Санту за фота бюлетэня, а пазьней яе арыштавалі на 15 сутак. Пасьля «сутак» яе перазатрымалі ў крымінальнай справе. Уладзімер паехаў сустракаць жонку пасьля арышту ў Жодзіне, але там яму паведамілі, што трэба падысьці на гутарку. У выніку яго затрымалі за фатаграфіі зь мітынгаў, якія знайшлі ў тэлефоне Санты. За кратамі мужа і жонку ўтрымлівалі больш за 4 месяцы.
У Ваўкавыску чацьвёра супрацоўнікаў АМАПу ў поўнай амуніцыі затрымалі работніка «Краснасельскбудматэрыялы»
Нагода затрыманьня мужчыны — нібыта распаўсюд экстрэмісцкіх матэрыялаў, а таксама матэрыялаў, якія «ганьбяць» Аляксандра Лукашэнку і нацыянальныя сымбалі Рэспублікі Беларусь, паведамляюць праваабаронцы.
Чарговыя масавыя затрыманьні: на гэты раз за камэнтары аб загінулым баранавіцкім міліцыянце
У праўладных тэлеграм-каналах зьявіліся «пакаянныя» відэа зь пяцьцю мужчынамі, якіх абвінавачваюць у абразе загінулага сілавіка, паведамляе Zerkalo.io.
У сваіх тэлеграм-каналах сілавікі паведамляюць, што дзеяньні затрыманых кваліфікуюцца паводле арт. 130 КК (Распальваньне расавай, нацыянальнай, рэлігійнай або іншай сацыяльнай варожасьці). Пакараньне па ёй прадугледжвае да 10 гадоў пазбаўленьня волі.
