Усе пяцёра затрыманых праходзяць у адной справе, іх вінавацяць паводле чатырох артыкулаў Крымінальнага кодэксу:
- арт. 368 ч. 1 «Абраза прэзыдэнта»,
- арт. 290 ч. 2 «Пагроза зьдзяйсьненьня акту тэрарызму»,
- арт. 289 ч. 2 «Акт тэрарызму»,
- арт. 290-4 ч. 2 «Стварэньне арганізацыі для зьдзяйсьненьня тэрарыстычнай дзейнасьці ці ўдзел у ёй».
Падсудным ставяць у віну некалькі эпізодаў, якія ўлады называюць «актамі тэрарызму на Магілёўшчыне». Гаворка ідзе пра акты супраціву ўлетку і ўвосень мінулага года. А менавіта пра:
- спыненьне цягнікоў на 1,5 гадзіны каля станцыі Мірадзіна 11 жніўня 2021-га,
- сабатаж чыгункі 24 і 31 жніўня 2021-га каля станцый Цітаўка і Бабіна, а таксама 16 верасьня спыненьне працы «Табакеркі»;
- падпал стралковага ціру на стрэльбішчы «Кісялевічы» в\ч 5527.
Што вядома пра падсудных?
На лаве падсудных пяць чалавек:
- Канстанцін Ермаловіч — нарадзіўся ў Літве ў 1991 годзе, але пражывае ў Бабруйску, унесены ў сьпіс «тэрарыстаў».
- Віталь Мінкевіч — нарадзіўся ў 1994 годзе. Вядома, што Віталь працаваў у абутковай краме ў Бабруйску. Мужчына таксама ўнесены ў сьпіс «тэрарыстаў».
- Ігар Казлоў — нарадзіўся ў 1975 годзе, працаваў на «Бабруйскім заводзе трактарных дэталяў і агрэгатаў», унесены ў сьпіс «тэрарыстаў».
- Натальля Кед — нарадзілася ў расейскім Арзамасе, але зьяўляецца грамадзянкай Беларусі, пражывае ў Бабруйску. Афіцыйна не была працаўладкавана, таму апошняе месца працы невядомае.
- Надзея Полькіна — работніца «Бабруйсктрыкатажу», жыхарка Бабруйску. Апошні раз была ў сацсетках 18 сакавіка, мажліва, у гэты дзень яна і была затрыманая.
Канстанціна Ермаловіча, Віталя Мінкевіча, Ігара Казлова затрымалі 26 верасьня 2021 году, цяпер іх утрымліваюць у СІЗА-5 у Бабруйску. Статус і месцазнаходжаньне затрыманых жанчын невядомыя.
