Лінкі ўнівэрсальнага доступу

Пакет «6+». Расейскія акторы Бязрукаў і Машкоў трапяць пад санкцыі Эўразьвязу


Акцыя пратэсту ў падтрымку Ўкраіны і з патрабаваньнямі спыніць расейскую агрэсію
Акцыя пратэсту ў падтрымку Ўкраіны і з патрабаваньнямі спыніць расейскую агрэсію

Рада Эўразьвязу на ўзроўні міністраў замежных спраў узгадніла новыя санкцыі супраць Расеі за разьвязаную ва Ўкраіне поўнамаштабную вайну. Як адзначаюць дыпляматы, новыя абмежаваньні хутчэй дапаўняюць раней уведзеныя.

Чарговы пакет абмежаваньняў уключае ў сябе эмбарга на расейскае золата і пашырэньне сьпісу тавараў падвойнага прызначэньня, забароненых да экспарту ў Расею, піша «Настоящее время».

Пашырыўся сьпіс пэрсанальных санкцый. Згодна з праектам дакумэнту, пад санкцыі падпадуць: першы віцэ-прэм’ер Расеі Андрэй Белавусаў (у дакумэнце гаворыцца, што «на наступны дзень пасьля ўварваньня ён прысутнічаў на нарадзе ў Крамлі і пераконваў расейскіх алігархаў, якія сабраліся там, працягнуць супрацоўніцтва з падсанкцыйнымі расейскімі банкамі»), мэр Масквы Сяргей Сабянін (якога лічаць блізкім Пуціну) і двое народных артыстаў Расеі — Сяргей Бязрукаў і Ўладзімір Машкоў. Першы падтрымаў расейскае ўварваньне ва Ўкраіну, другі выступае за прызнаньне так званых «ЛНР» і «ДНР».

У сьпісе ёсьць і тыя, каго паставілі на чале расейскіх акупацыйных уладаў у захопленых украінскіх гарадах. Агулам санкцыі закрануць 47 фізычных і 9 юрыдычных асоб.

Кіраўнік дыпляматыі ЭЗ Жузэп Бурэль падкрэсьліў, што Эўропе ня варта аслабляць санкцыі супраць Расеі, а наадварот — варта пайсьці на «дэтаксыкацыю» ад расейскіх энэрганосьбітаў, нават нягледзячы на рост цэнаў і нязручнасьці для саміх эўрапейцаў.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG