Імпрэзы на «Тутака», названай арганізатарамі «фэстывалем абуджаных», адбываліся два дні, 15-16 ліпеня ва ўрочышчы Барык каля Гарадка на Падляшшы. Сярод выступоўцаў былі J:Mors, Šuma, Лявон Вольскі і іншыя. У праграме былі заняткі для дзяцей і два спэктаклі.
Старшыня Рады БНР Івонка Сурвіла падзякавала ўдзельнікам фэстывалю «Тутака», яе прамову прадэманстравалі на вялікім экране фэстывальнай сцэны, піша Радыё Рацыя.
«Беручы пад увагу падзеі ў Беларусі, я думаю мы ўсе разумеем, да якой ступені кожнае сьвяткаваньне нашай спадчыны і нашай культуры ёсьць цэннае. Гэта наш спосаб сказаць суседзям, што мы жывем і не дазволім ворагам з усходу і іхным халуям сьцерці з паверхні зямлі нашую душу. Хачу падзякаваць сябрам зь Беласточчыны, што бароніце яе ўсімі сіламі».
Таксама Івонка Сурвіла адзначыла, што надзвычай важна перадаваць беларускія нацыянальныя каштоўнасьці дзецям.
«...Разам мы выратуем нашы каштоўнасьці і перададзім іх нашым дзеткам, заданьнем якіх будзе бараніць іх наступныя тысячагодзьдзі», — сказала Івонка Сурвіла.
Фэстываль «Тутака» праходзіў на Беласточчыне ў другі раз. Арганізатары абяцаюць, што фэстываль стане традыцыйным і ўжо налета адбудзецца трэці фэстываль.
