Лінкі ўнівэрсальнага доступу

Bloomberg: У Эўразьвязе блякуюць крэдыт Украіне на 1,5 млрд эўра


Сьцягі Эўразьвязу і Ўкраіны каля будынку Эўрапарлямэнту ў Брусэлі
Сьцягі Эўразьвязу і Ўкраіны каля будынку Эўрапарлямэнту ў Брусэлі

Эўрапейскі крэдытны банк гатовы выдаць Кіеву грошы на падтрымку эканомікі, але гэтаму перашкаджае бюджэтнае падразьдзяленьне Эўракамісіі, асьцерагаючыся фінансавай неплатаздольнасьці Ўкраіны.

Пра гэта са спасылкай на агенцтва Bloomberg піша DW.

З прычыны бюракратычных праблем блякуецца крэдыт Эўразьвязу Ўкраіне на суму 1,5 млрд эўра, паведамляе Bloomberg са спасылкай на эўрапейскіх чыноўнікаў, якія пажадалі застацца неназванымі. Паводле аднаго зь іх, эўрапейская асьцярожнасьць пераважае над вострымі патрэбамі Ўкраіны.

Паводле дадзеных агенцтва, Эўрапейскі крэдытны банк (EIB) гатовы выдзеліць Кіеву сродкі на падтрымку спустошанай вайной дзяржавы ў сытуацыі, калі выдаткі на абарону растуць, а даходы падаюць, але бюджэтнае падразьдзяленьне Эўракамісіі блякуе выдачу гэтага крэдыту, асьцерагаючыся фінансавай неплатаздольнасьці Ўкраіны.

Паводле інфармацыі крыніц, звычайна Эўракамісія дае гарантыі пад крэдыты EIB для апэрацый за межамі Эўразьвязу, якія складаюць 9% ад агульнага аб’ёму фінансаваньня. Але ў гэтым выпадку бюджэтнае падразьдзяленьне Эўракамісіі настойвае на забесьпячэньні 70% на той выпадак, калі Ўкраіна ня зможа вярнуць сродкі.

Эўразьвяз баіцца страціць сродкі

Эўразьвяз павінен быць упэўнены, што ў выпадку дэфолту ва Ўкраіне ўзьніклыя страты будуць пакрытыя. У сувязі з гэтым Эўракамісія шукае альтэрнатыўныя рашэньні для разьдзяленьня часткі дадатковых рызык, якія маюць дачыненьне да гэтага крэдыту, растлумачыў эўрапейскі чыноўнік.

Акрамя таго, піша Bloomberg, ЭЗ сам адчувае цяжкасьці ва ўзгадненьні кароткатэрміновага фінансаваньня Ўкраіны і ўжо часова скараціў аб’ём дапамогі, якая накіроўваецца Кіеву. Так, на мінулым тыдні застопарылася выдзяленьне Ўкраіне макрафінансавай дапамогі на 1 млрд эўра, першага траншу абвешчанага ў траўні пакету на 9 млрд эўра, — з прычыны таго, што гэты буйны пакет блякуе Нямеччына.

Новая дапамога Ўкраіне ад NATO

Раней, 29 чэрвеня, стала вядома, што на саміце NATO ў Мадрыдзе прынялі новы пакет дапамогі Ўкраіне, які дапаможа ёй перайсьці на зброю стандартаў альянсу. Ён таксама прадугледжвае прадстаўленьне Кіеву нелетальнай дапамогі, напрыклад паліва. Паводле інфармацыі крыніцы DW у NATO, на новы пакет выдзеляць некалькі сотняў мільёнаў эўра.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG