Прадстаўнікі абедзьвюх канфэсій заклікалі кіраўнікоў сваіх цэркваў пачаць афіцыйны дыялёг ужо да дня Хрышчэньня Кіеўскай Русі-Украіны, які летась абвясьцілі Днём украінскай дзяржаўнасьці.
«Гэта стане найлепшым падарункам да гэтага сьвята як вернікам нашых цэркваў, так і ўсяму ўкраінскаму грамадзтву», — адзначаецца ў дэклярацыі. Да яе падпісаньня могуць далучыцца ўсе прадстаўнікі праваслаўных цэркваў украінскай і расейскай юрысдыкцыі.
Сустрэча духавенства адбылася 5 ліпеня пры садзейнічаньні Міністэрства культуры і інфармацыйнай палітыкі, Дзяржаўнай службы ў этнапалітыцы і свабодзе сумленьня, а таксама нацыянальнага запаведніку «Сафія Кіеўская», на тэрыторыі якога адбывалася сустрэча духавенства двух Праваслаўных цэркваў Украіны.
Як адрэагавалі ў аўтакефальнай царкве Ўкраіны
Сьвятар Праваслаўнай царквы Ўкраіны Андрэй Дудчанка па выніках сустрэчы заявіў, што дзьве канфэсіі маюць больш супольнага, чым таго, што іх разьдзяляе.
«Мы маем агульную веру, агульную багаслоўскую, літургічную і кананічную традыцыі. Мы маем агульную гісторыю, але часам адрозьніваемся ў ацэнцы пэўных падзей у гісторыі. Трэба працаваць над агульным бачаньнем гісторыі. Мы адзіныя ў разуменьні дэструктыўнай пазыцыі Маскоўскага патрыярхату, які падтрымаў вайну супраць Украіны. Мы маем шмат агульных праблем. Усе мы выхадцы з РПЦ. Усе мы адчуваем брак адукацыі духавенства і епіскапату. Нашым цэрквам характэрная „візантыйшчына“ ў пляне празьмернага акцэнтаваньня рытуалу, розных „цацак“ і атрыбутаў улады і аўтарытэту», — напісаў Андрэй Дудчанка на сваёй старонцы ў Facebook.
Як адрэагавалі на сустрэчу прадстаўнікі УПЦ Маскоўскага патрыярхату
Мітрапаліт Нежынскі Клімент, які зьяўляецца сьпікерам Украінскай праваслаўнай царквы Маскоўскага патрыярхату, стрымана адрэагаваў на гэтую сустрэчу сьвятароў.
«Я б не назваў гэта пачаткам дыялёгу на нізавым узроўні. Бо гэтую сустрэчу мадэраваў Мінкульт, таму трэба рабіць папраўку на ініцыятараў і тых, хто забясьпечыў лягістыку сустрэчы», — цытуе ВВС News мітрапаліта Клімента.
Мітрапаліт таксама дадаў, што кіраўніцтва царквы не санкцыянавала ўдзелу ў гэтай сустрэчы сваім сьвятарам. Ён дадаў, што на саборы ў траўні УПЦ дакладна заявіла, што для пачатку рэальнага дыялёгу ПЦУ мусіць перастаць прымаць у сваю юрысдыкцыю прыходы УПЦ.
Што кажуць улады Ўкраіны
У сустрэчы ўдзельнічалі 20 сьвятароў ад дзьвюх цэркваў. Яе мадэравала кіраўніца Дзяржаўнай службы ў этнапалітыцы і свабодзе сумленьня Алена Богдан.
«Лёд скрануўся. Упершыню з моманту стварэньня ПЦУ сьвятары дзьвюх цэркваў сустрэліся, каб абмяняцца думкамі аб сучаснасьці і будучыні», — заявіла Алена Богдан.
Прадстаўніца дзяржаўнай структур прызналася, што да апошняй хвіліны перажывала, каб сустрэча не сарвалася.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
