Беларуская дэлегацыя не атрымала візаў для ўдзелу ў 29-й сэсіі Парлямэнцкай асамблеі АБСЭ, якая праходзіць у Вялікай Брытаніі ў Бірмінгеме. Пра гэта заявіў старшыня камісіі Палаты прадстаўнікоў па міжнародных справах Андрэй Савіных, перадае БелТА.
«Мы падалі заяву на візу ў адпаведнасьці з патрабаваньнямі брытанскага боку і ў патрэбны тэрмін. Пад надуманымі крывадушнымі падставамі ў візе нам было адмоўлена», — сказаў Савіных.
Паводле яго слоў, дэпутаты былі гатовыя да «жорсткага абмену думкамі».
Гэта ўжо ня першы раз, калі дэпутат Савіных ня зможа ўдзельнічаць у штогадовай сэсіі Парлямэнцкай Асамблеі АБСЭ. Так, летась, калі яму адмовілі ў выдачы візы, палітык ня трапіў у Вену.
Тады сам Андрэй Савіных тлумачыў адмову тым, што ён зьбіраўся абмяркоўваць у АБСЭ ўцягнутасьць «спэцслужбаў шэрагу дзяржаў, у тым ліку Польшчы, у апэрацыю па захопе ўлады ў Рэспубліцы Беларусь праз сцэнар каляровай рэвалюцыі».
