Лінкі ўнівэрсальнага доступу

У Міністэрстве абароны Ўкраіны сьцьвярджаюць, што беларуская армія ўсталёўвае на мяжы драўляныя танкі


Ілюстрацыйнае фота
Ілюстрацыйнае фота

У Міністэрстве абароны Ўкраіны заявілі, што Беларусь да аховы дзяржаўнай мяжы з Украінай пачала залучаць вайскоўцаў тэрміновай службы.

«Асноўныя высілкі беларускія вайскоўцы сканцэнтравалі на вядзеньні выведкі, на інжынэрным абсталяваньні пазыцый, а таксама на ахове дзяржаўнай мяжы. Прычым пачалі залучаць вайскоўцаў тэрміновай службы», — сказаў сьпікер Міністэрства абароны Ўкраіны Аляксандар Матузянік 22 чэрвеня на брыфінгу ў Кіеве.

Паводле яго, у беларускім памежжы таксама працягваецца праверка баявой гатоўнасьці Ўзброеных сіл Беларусі.

«З мэтай правядзеньня апэратыўнага маскаваньня і дэманстрацыі сваёй прысутнасьці падразьдзяленьні Ўзброеных сіл Рэспублікі Беларусь разьмяшчаюць у памежных з Украінай раёнах драўляныя муляжы танкаў», — дадаў Аляксандар Матузянік.

Сьпікер Міністэрства абароны Ўкраіны адзначыў, што нягледзячы на тое, што сур’ёзных зьменаў у сытуацыі на мяжы зь Беларусьсю не адбываецца, пагроза нанясеньня зь беларускай тэрыторыі ракетных удараў па Ўкраіне ўсё яшчэ застаецца.

Аляксандар Матузянік дадаў, што цяпер украінскі бок удакладняе інфармацыю пра магчымае перакіданьне з Расеі ў Беларусь зэнітна-ракетных комплексаў «С-300». У той жа час, паводле яго, зьвесткі аб мабілізацыі ў беларускае войска пакуль не пацьвярджаюцца.

«Там ствараецца так званае паўднёвае апэратыўнае камандаваньне, што прадугледжвае павелічэньне колькасьці Ўзброеных сіл Беларусі на 20 тысяч. У сувязі з гэтым там праводзіцца рэкрутынгавая кампанія. Наконт мабілізацыі я ня маю зьвестак», — сказаў ён.

Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG