Рэпартаж з пастаноўкі падрыхтавала выданьне «Hrodna-life». Паказы адбыліся 17–19 чэрвеня.
Паставіў спэктакль рэжысэр Андрус Дарала. Яго паказалі ў Рускім тэатры Літвы ў час паэтычнага фэстывалю «Жывое слова».
У пастаноўцы ўдзельнічалі горадзенскія акторкі Натальля Лявонава, Натэла Бялугіна і Ганна Іванова.
Увесь спэктакль базуецца на тэкстах журналісткі з Марыюпалю Надзеі Сухарукавай. Яна была адной з тых, хто ратаваўся ў сутарэньнях тэатру.
«Усё пачалося з тэлефоннага званка, — расказала акторка Натальля Лявонава. — Патэлефанаваў знаёмы рэжысэр з Марыюпалю і папрасіў запісаць відэаводгук на пост у сацсетках журналісткі Надзеі Сухарукавай».
Калі пра гэта даведаліся калегі, то прапанавалі і сваю падтрымку — так нарадзілася ідэя спэктаклю.
Спачатку артысты меркавалі, што паставяць п’есу, якую рыхтавалі да прэм’еры ў Марыюпалі. Потым вырашылі больш працаваць з тэкстамі Сухарукавай.
«Гэта пакуль эскізная работа, — патлумачыла Натальля Лявонава. — Гісторыя ня скончана, і п’еса толькі пішацца».
На сцэне большасьць часу былі толькі тры акторкі. Але ў іх расказах паўставалі іншыя героі: хлопчык, што вядзе дзёньнік, стары, які чакае, каб на абед далі «другое», а ня толькі суп і ваду, дзяўчынка, што крычыць, бо баіцца цемры.
«Зараз вы ведаеце, як мог выглядаць і той падвал», — казаў рэжысэр Андрус Дарала.
Пасьля эвакуацыі з Марыюпалю Надзея Сухарукава прыехала ў Літву і цяпер жыве ў Клайпедзе. Натальля Лявонава расказала, што яны наведалі журналістку і пазнаёміліся. Гэта, кажа Натальля, дапамагло ў працы над вобразамі ў спэктаклі.
«Была вялікая адказнасьць ад таго, што асабіста знаю гэтага чалавека. Цікава працаваць па тэкстах і перажываньнях знаёмай асобы. Я ж ніколі не была на вайне і ня ведаю, што адчувалі марыюпальцы, чакаючы сьмерці ў падвале тэатру. Я ніколі гэтага не адчувала, але павінна была расказаць правільна»
Спэктакль па хэштэгах
Тэхнічна спэктакль пабудаваны на сыстэме хэштэгаў. #Самалёт, #Аўтобус, #Асьцярожна ды іншыя перамяшчаюць гледачоў у розныя моманты трагічных падзеяў. Акторкі ўвесь час трымаюць у руках аркушы з тэкстамі роляў прэм’еры, што так і не адбылася.
«П’еса, як і вайна, пакуль ня скончана, — кажа акторка Натэла Бялугіна. — Працаваць у такім фармаце нязвыкла, гэта новы для мяне досьвед. Усе гісторыі, якія прагучалі ў спэктаклі, напісаныя Надзеяй [Сухарукавай]. Усе мы былі ў спэктаклі ёю, толькі ў розных іпастасях».
Цягам фэстывалю горадзенцы паказалі віленчукам яшчэ адзін свой спэктакль — «За што». Ён прысьвечаны падзеям Ночы (не)расстраляных паэтаў і ўпершыню быў прадстаўлены летась у кастрычніку.
Усе спэктаклі фэстывалю «Жывое слова», прадстаўленыя «Тэатрам Жніўня», прайшлі з аншлягам.
