Дэталямі размовы з рэдакцыяй «Зеркала» падзялілася чытачка Тацяна, якая патэлефанавала ў ведамства.
«Ён (Першы энэргаблёк БелАЭС —рэд.) адпрацоўвае пэўную колькасьць часу, яго спыняюць і праводзяць рэвізію стану ўсяго абсталяваньня, усіх вузлоў і элемэнтаў. Гэта плянавая нармальная праца — паглядзець, як увесь гэты час працавала сыстэма кантролю і гэтак далей», — удакладніла Вольга Пруднікава.
Паводле яе, запуск першага энэргаблёку адбудзецца ў ліпені, «паводле пляну».
У красавіку першы энэргаблёк БелАЭС вывелі ў плянава-папераджальны рамонт. Такія плянавыя тэхналягічныя работы штогод праводзяцца на атамных станцыях для забесьпячэньня стабільнага рабочага стану абсталяваньня, гаварылі ў Мінэнэрга. Тады ў ведамстве таксама часткова плянавалі перазагрузіць у рэактар сьвежае ядзернае паліва.
На пытаньне чытачкі, ці няма небясьпекі для насельніцтва з-за перагрузкі ядзернага паліва, Вольга Пруднікава таксама адказала, гэтая працэдура на атамнай станцыі — штатная, «з адпрацаванымі тэхналёгіямі».
«Паліва знаходзіцца ў нармальным стане. Вы калі батарэйкі мяняеце, чагосьці баіцеся? Вось і тут — спыняюцца рэактары. Можна праводзіць аналёгію з пальчыкавымі батарэйкамі, толькі памерам пабольш. Кожны пальчык вымаецца ў спэцыяльны магутны кран зь вялікім уздымам. Усё гэта адбываецца пад кантролем пэрсаналу. Усё гэта бачна і фіксуецца, — распавяла намесьніца міністра. — Як фізык па адукацыі, я ня бачу, чаго там можна баяцца. На атамнай станцыі ніякіх пытаньняў не было».
Першы энэргаблёк Беларускай атамнай электрастанцыі быў уведзены ў прамысловую эксплуатацыю 10 чэрвеня 2021 году. Да аб’яднанай энэргасыстэмы краіны яго падключылі 3 лістапада 2020 году.
З моманту ўключэньня ў сетку і да першага плянавага папераджальнага рамонту на першым энэргаблёку выпрацавана больш за 9,3 млрд. кВт/г электраэнэргіі. Праўда, за ўвесь гэты час яе неаднаразова адключалі ад сеткі — усяго прастою набегла на 173 дні, або 45,5% ад усяго часу працы станцыі.
