Пра гэта піша NewsMaker.
Такім чынам, патрабаваньне дзяржабвінавачваньня аб арышце Дадона суд задаволіў часткова.
Раніцай 24 траўня Антыкарупцыйная пракуратура Малдовы і Служба інфармацыі і бясьпекі правялі ператрусы ў доме Ігара Дадона па падазрэньні ў карупцыі, незаконным узбагачэньні і здрадзе радзіме. Пазьней яго затрымалі на 72 гадзіны.
Пра тое, што супраць былога прэзыдэнта Малдовы ўзбуджаная крымінальная справа, 18 траўня паведаміў партал NewsMaker. Яго западозрылі ў атрыманьні хабару ад экс-кіраўніка Дэмакратычнай партыі і бізнэсмэна Ўладзіміра Плахатнюка.
У 2020 годзе экс-дэпутат Юрый Рэніцэ апублікаваў зьняты схаванай камэрай відэазапіс, на якім Дадон сустракаўся з Плахатнюком і яго намесьнікам. На відэа Плахатнюк спрабаваў перадаць чорны пакет. Дадон да яго не дакранаўся, але сказаў: «Ізноў вы з кульком» і папрасіў перадаць яго нейкаму «Косьцю». Як сьцьвярджае Рэніцэ, запіс быў зроблены яшчэ ў 2019 годзе, калі Дадон займаў прэзыдэнцкую пасаду. У пакеце, паводле слоў былога дэпутата, была буйная грашовая сума.
На відэа Дадон і Плахатнюк таксама абмяркоўваюць стварэньне ў парлямэнце кааліцыі, якая мела б канстытуцыйную большасьць. Па дадзеных TV 8, Дадон пры гэтым казаў, што «пастаянна піша запіскі Пуціну».
Пасьля зьяўленьня гэтага відэа пачалося расьсьледаваньне, але антыкарупцыйная пракуратура першапачаткова ня выявіла злачынства, і суд адмовіўся ўзбуджаць справу. На мінулым тыдні Апэляцыйная палата Кішынёва адмяніла рашэньне суду. Дадон адмаўляе ўсе абвінавачаньні.
Да гэтага, у сьнежні 2021 году, Дадон таксама стаў падазраваным па справе аб крадзяжы 12 млн даляраў пры імпарце электраэнэргіі ў 2008 годзе з дапамогай дзяржкампаніі Energocom. Па вэрсіі сьледзтва, былы прэзыдэнт у змове з чыноўнікамі і іншымі асобамі, у тым ліку тымі, хто жыве за межамі Малдовы, арганізаваў злачынную схему. Неабгрунтавана павялічыўшы закупачную цану на электраэнэргію, ён і іншыя фігуранты прысвойвалі сабе розьніцу.
У адносінах да Плахатнюка ў Малдове расьсьледуецца крымінальная справа аб датычнасьці да буйных фінансавых афёр. У Расеі ён праходзіць па некалькіх крымінальных справах аб злачыннай дзейнасьці. Масква аб’явіла яго ў міжнародны вышук.
