Лінкі ўнівэрсальнага доступу

Баі пад Запарожжам; зноў абстрэл Чарнігаўшчыны; у Энэргадары ўзарвалі кіраўніка калябарантаў. 88-ы дзень вайны Расеі супраць Украіны

абноўлена

Шыльда пра аднаўленьне будынку на фоне ўжо разбомбленай расейскімі войскамі музычнай школы, Сьвятагорск, Данецкая вобласьць, Украіна
Шыльда пра аднаўленьне будынку на фоне ўжо разбомбленай расейскімі войскамі музычнай школы, Сьвятагорск, Данецкая вобласьць, Украіна

Свабода працягвае сачыць за падзеямі расейскага ўварваньня ва Ўкраіну. Вайна ідзе з 24 лютага, загінулі тысячы цывільных і вайскоўцаў, звыш 6 мільёнаў чалавек сталі ўцекачамі, яшчэ каля 7 мільёнаў хаваюцца ў іншых абласьцях. Расейскія ракеты і бомбы разбурылі многія аб’екты інфраструктуры.

Галоўнае на гэты момант

  • Прэзыдэнт Польшчы Анджэй Дуда выступіў у Вярхоўнай радзе Ўкраіны – першым з сусьветных лідараў з 24 лютага. «Пасьля Бучы, Барадзянкі, Марыюпалю з Расеяй ня можа быць спраў як «звычайна», спадары прэзыдэнты і прэм'еры», – сказаў Дуда, завочна зьвяртаючыся да сусьветных лідэраў.
  • Вярхоўная рада Ўкраіны падоўжыла ваеннае становішча і агульную мабілізацыю на 90 дзён – да 23 жніўня.
  • У Энэргадары падарвалі кіраўніка расейскай акупацыйнай адміністрацыі.
  • Мядзінскі заявіў аб гатоўнасьці да перамоваў і аб іх замарозцы Ўкраінай.
  • Украінскія вайскоўцы паведамляюць аб абстрэлах Чарнігаўскай вобласьці.
  • Расея разгарнула ў Белгародзкай вобласьці пускавыя ўстаноўкі апэратыўна-тактычнага ракетнага комплексу «Іскандэр-М», паведамляюць Узброеныя сілы Ўкраіны.
  • Украінскі Генштаб: у Беларусі разгарнулі ракетныя комплесы «Точка-У», «Смерч» і 7 батальёнаў, пагроза ракетна-бомбавых удараў і артылерыйскіх абстрэлаў з тэрыторыі Беларусі захоўваецца.
  • Паводле апошніх зьвестак ААН, з пачатку вайны ва Ўкраіне загінулі 3838 мірных жыхароў. Офіс Вярхоўнага камісара ААН у правах чалавека лічыць, што фактычныя лічбы значна вышэйшыя.
Тэрытарыяльны кантроль Украіны на 11 траўня 2022
Тэрытарыяльны кантроль Украіны на 11 траўня 2022

Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.

Што адбываецца 22 траўня

У Кіеў прыбыў прэзыдэнт Польшчы

Анджэй Дуда заклікаў эўрапейскіх калег з трыбуны Вярхоўнай Рады ў Кіеве ня мець ніякіх спрваў з Пуціным, бо злачынствы расейцаў у Марыюпалі і Бучы перакрэсьліваюць увесь сэнс такіх тэлефанаваньняў і перамоў. «Пасьля Бучы, Барадзянкі, Марыюпаля з Расеяй ня можа быць спраў як «звычайна», спадары прэзыдэнты і прэм'еры», – сказаў Дуда, завочна зьвяртаючыся да сусьветных лідэраў. Таксама ён заявіў, што Ўкраіну трэба будзе аднаўляць за кошт рэпарацый ад Расеі.

Мядзінскі заявіў аб гатоўнасьці да перамоваў і аб іх замарозцы Украінай

Расея не адмаўляецца ад перамоваў з Украінай і гатовая іх працягваць, аднак цяпер працэс замарожаны з ініцыятывы Кіева, заявіў памочнік прэзыдэнта Расеі і кіраўнік расейскай перамоўнай дэлегацыі Ўладзімір Мядзінскі ў эфіры беларускага тэлеканалу АНТ.

У Энэргадары падарвалі кіраўніка расейскай акупацыйнай адміністрацыі

Выбух грымнуў, калі Шэўчык заходзіў у пад’езд свайго дома. Здарэньне пацьвярджаюць як украінскія, так і расейскія СМІ, якія са спасылкай на мэра Энэргадару Дзьмітрыя Арлова паведамляюць, што Шэўчык і два ягоныя ахоўнікі шпіталізаваныя з траўмамі рознай ступені цяжкасьці.

У Мікалаеве зь лютага загінулі 97 чалавек

З пачатку поўнамаштабнай вайны ва ўкраінскім Мікалаеве загінулі 97 чалавек, сярод якіх адно дзіця. Таксама вядома пра 436 параненых. Пра гэта ў інтэрвію «Громадському радіо» паведаміў мэр Мікалаева Аляксандар Сянкевіч.

«На сёньня баявых дзеяньняў у Мікалаеве не адбываецца. Найбліжэйшыя баі ў раёне населенага пункту Аляксандраўка — за 20 кілямэтраў ад Мікалаева. Але мы рыхтуемся да любога сцэнару і працягваем працаваць на трох лініях абароны. Рыхтуем, капаем траншэі, усталёўваем блёкі. Штодня акупанты абстрэльваюць горад. Большасьць з іх — касэтныя снарады, галоўная ідэя якіх — забіваць людзей», — сказаў мэр.

Ён таксама адзначыў, што бамбаваньні працягваюцца, таму вяртацца ў горад небясьпечна, і дадаў, што больш за палову насельніцтва пакінулі Мікалаеў.

Вярхоўная Рада прыняла закон аб забароне сымболікі Z і V

Вярхоўная Рада прыняла закон аб забароне сымболікі Z і V з прапановамі прэзыдэнта Ўкраіны Ўладзіміра Зяленскага.

У законе пашыраецца сьпіс выпадкаў, калі выкарыстаньне ўказанай сымболікі не забароненае, напрыклад, калі гэта адбываецца ў легітымных мэтах і без прыкмет прапаганды. Размова ідзе аб экспазыцыях музэяў, тэматычных выставах і бібліятэчных фондах.

Украінскія вайскоўцы паведамляюць аб абстрэлах Чарнігаўскай вобласьці

Расейскія войскі абстралялі прымежныя раёны Чарнігаўскай вобласьці, паведамляюць у апэратыўным камандаваньні «Поўнач».

«Сёньня каля 15:45 назіральнікі зафіксавалі шэсьць «прыходаў» з тэрыторыі Расеі, верагодна, з АГС у раён населенага пункта Сянькоўка».

У суботу паведамлялася аб абстрэлах памежных раёнаў Сумскай і Чарнігаўскай абласьцей.

Украінская выведка паведамляе пра пахаваньне беларускіх наймітаў, якія ваявалі на баку Расеі

Асобныя беларускія вайскоўцы бяруць удзел у вайне з Украінай у складзе расейскіх ПВК, заяўляе ўкраінская выведка.

У Беларусі пахавалі некалькіх вайскоўцаў, якія бралі ўдзел у вайне супраць Украіны ў складзе расейскіх прыватных вайсковых кампаній і загінулі там, сьцьвярджае Галоўнае ўпраўленьне выведкі Ўзброеных сіл Украіны.

Удар па артылерыйскіх сыстэмах

Дзякуючы ўзгодненым дзеяньням з партызанамі ўкраінскія стралкі зьнішчылі некалькі артылерыйскіх сыстэм расейскага войска, гаворыцца ў паведамленьні Запароскай абласной вайсковай адміністрацыі. Украінскія вайскоўцы працягваюць адціскаць праціўніка на поўдзень.

На гэтыя паразы, як сьцьвярджае ўкраінскі бок, захопнікі адказалі ўзмацненьнем кантролю на блёк-пастах і даглядам ня толькі прыватных аўтамабіляў, але і грамадзкага транспарту ў Мелітопалі.

Што адбываецца ў Расеі

Расея забараніла ўезд Джо Байдэну і яшчэ 962 грамадзянам ЗША

У сьпісе, сярод іншых, апынуліся прэзыдэнт ЗША Джо Байдэн, ягоны сын Хантэр Байдэн, дырэктар ЦРУ Уільям Бэрн, чальцы палаты прадстаўнікоў ад рэспубліканскай і дэмакратычнай партый, дзяржсакратар ЗША Энтані Блінкен, журналісты, палітыкі, прадпрымальнікі, судзьдзі, адвакаты, сілавікі, вайскоўцы і інш. У паведамленьні МЗС РФ гаворыцца, што санкцыі ўведзеныя «ў кантэксьце мераў у адказ на пастаянна ўведзеныя ЗША антырасейскія санкцыі».

У Дзярждуме Расеі прапанавалі адмяніць абмежаваньні па ўзросьце для вайскоўцаў-кантрактнікаў

У Дзярждуму ўнесьлі законапраект аб адмене верхняга ўзроставага парога для заключэньня першага вайсковага кантракту.

Цяпер першы вайсковы кантракт можа заключыць расіянін да 40 гадоў і замежнік да 30 гадоў. Аўтары законапраекту прапануюць адмяніць узроставую мяжу для грамадзян працаздольнага ўзросту. Для мужчын гэта 65 гадоў.

Авіякампанія S7 адмяніла рэйсы на захад і поўдзень Расеі, а таксама ў Крым да чэрвеня і верасьня

На гэта зьвярнула ўвагу агенцтва «РИА Новости». Авіяперавозчык закрыў продажы на рэйсы ў Анапу, Геленджык, Краснадар і Сімферопаль да 23 чэрвеня, а на рэйсы з Масквы ў Белгарад, Бранск, Варонеж і Ліпецк — да канца верасьня.

Расавіяцыя закрыла пералёты ў кожны з названых аэрапортаў 24 лютага, у дзень пачатку вайны Расеі супраць Украіны, а потым падаўжала забарону больш як дзесяць разоў. Цяпер пералёты фармальна закрытыя да 13 траўня.

Удзел Беларусі ў вайне

Беларусь дазволіла Расеі скарыстаць сваю тэрыторыю для нападаў на Ўкраіну з поўначы; расейцы выкарыстоўваюць беларускія аэрадромы для палётаў і беларускія пляцоўкі для ракетных абстрэлаў гарадоў Украіны. Разам з тым на баку Ўкраіны ў розных злучэньнях ваююць беларусы. Створаны батальён імя Кастуся Каліноўскага.

Украінскі Генштаб: у Беларусі разгарнулі комплексы «Точка-У» і «Сьмерч»

У Беларусі на асобных палігонах разгарнулі два ракетныя дывізіёны тактычнага ракетнага комплексу «Точка-У» і дывізіён рэактыўнай сыстэмы залпавага агню «Сьмерч», паведаміў Генштаб Узброеных сіл Украіны ў вечаровай зводцы 20 траўня, пагроза ракетна-бомбавых удараў і артылерыйскіх абстрэлаў з тэрыторыі Беларусі пакуль ня зьнікла.

Беларускае войска ля мяжы з Украінай

Кіраўнік Генэральнага штабу Ўзброеных сіл, першы намесьнік міністра абароны Беларусі Віктар Гулевіч заявіў аб пачатку другога этапу праверкі сіл апэратыўнага рэагаваньня.

Паводле ягоных слоў, у рамках гэтага этапу на Заходні і Паўночна-заходні апэрацыйныя кірункі рушылі батальённа-тактычныя групы, а для іх узмацненьня — падразьдзяленьні супрацьпаветранай абароны, ракетных войскаў і артылерыі, якія будуць забясьпечваць іхнае баявое функцыянаваньне.

Паводле Гулевіча, падразьдзяленьні сіл спэцыяльных апэрацый разгарнулі на трох тактычных кірунках паўднёвага кірунку (да мяжы з Украінай. — РС).

Як рэагуе сьвет

Байдэн падпісаў законапраект аб наданьні 40 млрд даляраў дапамогі Ўкраіне

21 траўня прэзыдэнт ЗША Джо Байдэн падпісаў законапраект аб наданьні Ўкраіне 40 мільярдаў даляраў. Пакет прадугледжвае выдзяленьне дапамогі ў сфэры бясьпекі на 6 млрд даляраў, у тым ліку навучаньне, абсталяваньне, узбраеньне і падтрымку. Яшчэ 8,7 млрд мяркуецца накіраваць на папаўненьне запасаў амэрыканскага абсталяваньня, адпраўленага Ўкраіне, 3,9 млрд — на апэрацыі Эўрапейскага камандаваньня ЗША, 11 млрд Байдэн можа выкарыстаць для перадачы прадметаў і паслуг з амэрыканскіх запасаў без ухваленьня Кангрэсу.

ЗША перададуць Украіне ўзбраеньне яшчэ на 100 мільёнаў даляраў

У гэтым пакеце будуць пастаўкі 18 гаўбіц калібрам 155 мм і 18 тактычных машын для перавозу гэтых гаўбіц — эквівалент артылерыйскага батальёну, паведаміў прэс-сакратар Пэнтагону Джон Кірбі. Таксама ў пакеце дапамогі будзе 36 антыартылерыйскіх радараў ANTPQ.

Напярэдадні на брыфінгу ў Вашынгтоне неназваны высокі прадстаўнік Пэнтагону расказаў журналістам, што 79 з пастаўленых ЗША раней 90 гаўбіц ужо разьмешчаныя на пазыцыях украінскіх войскаў і выкарыстоўваюцца ў баявых дзеяньнях.

Эўрапарлямэнт: Усе санкцыі ЭЗ супраць Расеі павінны распаўсюджвацца на Беларусь

У чацьвер дэпутаты Эўрапарлямэнту прынялі рэзалюцыю, у якой асуджаюць падтрымку рэжымам Лукашэнкі вайны Расеі супраць Украіны і заклікаюць распаўсюдзіць на Беларусь усе санкцыі супраць Расеі, якія ўжо ўведзеныя і будуць уведзеныя.

Таксама ў рэзалюцыі заклікаюць правесьці расьсьледаваньне злачынстваў рэжыму Аляксандра Лукашэнкі супраць беларускага народа, заклікаюць краіны ЭЗ актыўна прымяняць прынцып унівэрсальнай юрысдыкцыі і рыхтаваць судовыя справы супраць беларускіх службовых асобаў, у тым ліку Лукашэнкі, адказных за гвалт і рэпрэсіі ў Беларусі.

Эўрапарлямэнт падтрымаў стварэньне трыбуналу, каб судзіць Расею за ваенныя злачынствы

Чальцы Эўрапарлямэнту падтрымалі рэзалюцыю з заклікам да ЭЗ падтрымаць стварэньне спэцыяльнага трыбуналу па злачынстве агрэсіі супраць Украіны і прадаставіць яму неабходныя рэсурсы і падтрымку, паведаміў міністар замежных спраў Украіны Дзьмітры Кулеба.

Эўрапарлямэнт прыняў рашэньне адмяніць імпартнае мыта для Ўкраіны на год

У Эўрапарлямэнце выказаліся за ідэю адмены пошлін на імпарт у ЭЗ з Украіны для таго, каб падтрымаць эканоміку краіны. За прагаласавалі 515 дэпутатаў, супраць — 32, устрымаліся — 11. Дзейнічаць гэтая льгота будзе на працягу году. Адмена пошлін датычыцца экспарту прамысловай прадукцыі, садавіны і агародніны, а таксама антыдэмпінгавых пошлін адносна імпарту сталі. Рашэньне Эўрапарлямэнту пачне дзейнічаць пасьля таго, як яго апублікуюць у афіцыйным часопісе ЭЗ, пасьля чаго на наступны дзень яно набудзе моц. Як мяркуецца, гэта можа адбыцца ў чэрвені.

Сэнат ЗША 19 траўня ўхваліў новы пакет дапамогі Ўкраіне ў памеры 40 млрд даляраў

Цяпер яго павінен падпісаць Джо Байдэн. На мінулым тыдні Сэнат ЗША спрабаваў прыняць закон у паскораным фармаце, але галасаваньне заблякаваў рэспубліканец Рэнд Пол.

Значная частка з гэтай сумы пойдзе на зброю, таксама плянуецца накіраваць сродкі на гуманітарныя мэты і падтрымку эканомікі Ўкраіны.

Украіна атрымае гуманітарную дапамогу ад Польшчы ў выглядзе бэнзіну

Пра гэта паведаміла віцэ-прэм'ер, міністар эканомікі Юлія Свірыдзенка. Паводле Свірыдзенкі, Польшча дасьць агулам 25 тысяч тон з уласных запасаў. Як паведамляе прэс-служба Кабінэта міністраў, пастаўкі паліва пачнуцца на наступным тыдні.

Дэфіцыт паліва на АЗС Украіны ўзьнік у канцы красавіка. У канцы сакавіка расейскія вайскоўцы пачалі наносіць авіяўдары па паліўных базах. Разбураныя або пашкоджаны нафтабазы ў Львоўскай, Валынскай, Ровенскай, Палтаўскай, Днепрапятроўскай і Адэскай абласьцях. Таксама ў выніку расейскіх авіяўдараў была разбураная інфраструктура Крэменчугскага НПЗ, найбуйнейшай нафтавай кампаніі Ўкраіны, якая забясьпечвае больш за траціну ўсяго ўкраінскага рынку паліва.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG