Лінкі ўнівэрсальнага доступу

Эўрапарлямэнт: Санкцыі ЭЗ супраць Расеі павінны распаўсюджвацца і на Беларусь


Будынак Эўрапейскага парлямэнту
Будынак Эўрапейскага парлямэнту

У рэзалюцыі, прынятай у чацьвер, Эўрапарлямэнт катэгарычна выступае супраць той ролі, якую беларускі рэжым адыграў у садзейнічаньні незаконнай вайне Расеі супраць Украіны.

Гэта ўключае ў сябе так званы рэфэрэндум аб аднаўленьні ядзернага статусу краіны, а таксама тое, што Беларусь дазволіла расейскім войскам і ўзбраеньням перамяшчацца па сваёй тэрыторыі, выкарыстоўваць сваю паветраную прастору, дазапраўляцца палівам і захоўваць боепрыпасы.

Такім чынам, дэпутаты Эўрапарлямэнту лічаць, што беларускі рэжым нясе сумесную адказнасьць за напад усімі юрыдычнымі наступствамі, якія вынікаюць зь міжнароднага права.

Акрамя таго, яны таксама адзначаюць рост ролі Расеі ў Беларусі, у тым ліку яе фінансавы ўплыў, што, паводле іх слоў, выклікае сур’ёзныя сумненьні ў здольнасьці Беларусі прымаць сувэрэнныя рашэньні.

Асноўныя пункты рэзалюцыі:

  • Беларусь і Расея салідарна адказныя за вайну ва Ўкраіне
  • Рэпрэсіі беларускага рэжыму супраць прафсаюзаў і апазыцыі павінны спыніцца
  • Заклік да неадкладнай адмены сьмяротнага пакараньня
  • Умацоўваць супрацоўніцтва ЭЗ зь беларускімі дэмакратычнымі сіламі
  • Дэпутаты Эўрапарлямэнту рашуча асуджаюць падтрымку, якую беларускі рэжым аказаў несправакаванай вайне Расеі ва Ўкраіне.

Парлямэнт вітае прапанову Эўракамісіі аб шостым пакеце санкцый супраць Расеі і Беларусі і заклікае краіны ЭЗ у Радзе забясьпечыць яго ўсёабдымную і хуткую рэалізацыю. Усе санкцыі ЭЗ, уведзеныя супраць Расеі, павінны быць люстранымі ў дачыненьні да Беларусі і прымяняцца належным чынам, заклікаюць дэпутаты Эўрапарлямэнту, «у тым ліку ва ўсіх будучых пакетах санкцый».

У рэзалюцыі таксама падкрэсьліваецца неабходнасьць усебаковага расьсьледаваньня злачынстваў, учыненых рэжымам Аляксандра Лукашэнкі супраць беларускага народу. Яна заклікае краіны ЭЗ актыўна прымяняць прынцып унівэрсальнай юрысдыкцыі і рыхтаваць судовыя справы супраць беларускіх службовых асоб, адказных або датычных да гвалту і рэпрэсій, уключаючы самога Лукашэнку.

Эўрапарлямэнт таксама асуджае нядаўнія зьмены, унесеныя ў Крымінальны кодэкс Беларусі, якія прадугледжваюць сьмяротнае пакараньне за «замах на тэрарыстычны акт». Гэты ход можа быць лёгка выкарыстаны рэжымам супраць сваіх палітычных апанэнтаў, заяўляюць дэпутаты Эўрапарлямэнту, паколькі многія палітычныя зьняволеныя ў Беларусі былі абвінавачаныя або ўжо прыгавораныя да працяглых тэрмінаў пазбаўленьня волі па артыкуле аб тэрарызьме.

Нарэшце, дэпутаты Эўрапарлямэнту ўказваюць на неабходнасьць умацаваньня супрацоўніцтва ЭЗ зь беларускімі дэмакратычнымі сіламі, у тым ліку праз рэгулярныя саміты і надзейную фінансавую дапамогу.

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG