«Што датычыць запісу CNN, то мы змаглі ня толькі зафіксаваць на відэа, але і ідэнтыфікаваць іх. Мы думаем, што ад адказнасьці не схавацца», — паведаміў Яўген Енін 13 траўня ў эфіры ўсеўкраінскага тэлемаратону #UAРазом.
Паводле яго, сьледчыя выкарыстоўваюць запісы з камэр відэаназіраньня для вызначэньня асобаў, якія зрабілі ваеннае злачынства.
«Наша праграмнае забесьпячэньне, якое нам далі міжнародныя партнэры, дазваляе амаль ва ўсіх выпадках ідэнтыфікаваць такіх расейскіх забойцаў. Мы выкарыстоўваем такую праграму, якая дазваляе параўноўваць у аўтаматычным рэжыме з фатаздымкамі ў базе дадзеных, якая налічвае больш як 10 мільярдаў фота», — удакладніў намесьнік міністра ўнутраных спраў Украіны.
Яўген Енін дадаў, што такая праграма дапамагае ідэнтыфікаваць і тых грамадзян Украіны, якія пасьля баявых дзеяньняў у вызваленых гарадах займаюцца маёмаснымі злачынствамі, так званым марадэрствам, што таксама ўваходзіць у пералік ваенных злачынстваў.
Раней тэлекампанія CNN апублікавала відэазапіс з камэр назіраньня аднаго з аўтасалёнаў пад Кіевам. На ім відаць, як расейскія салдаты стрэламі ў сьпіну забілі двух бяззбройных мірных жыхароў.
Паводле CNN, украінская пракуратура расьсьледуе гэтую справу па фактах парушэньня законаў і звычаяў вайны.
Журналісты змаглі ідэнтыфікаваць асобы загінулых. Адзін зь іх быў уласьнік абрабаванага аўтасалёну, а другі — 68-гадовы ахоўнік Леанід Пляц.
На відэазапісе, зробленым 16 сакавіка, відаць, як пяць расейскіх вайскоўцаў спрабуюць прайсьці ў аўтасалён, страляюць па замках і разьбіваюць шыбы.
Калі гаспадар падыходзіць з паднятымі рукамі, яго спыняюць і абшукваюць, магчыма, на наяўнасьць зброі. Потым падышоў Пляц, і яго таксама абшукалі. Паміж імі і расейцамі, пэўна, адбылася нейкая размова, пасьля якой двое цывільных разьвярнуліся, каб ісьці на пост аховы.
Аднак пасьля гэтага два расейскія салдаты падыходзяць да іх са сьпіны і страляюць. Абодва цывільныя падаюць на зямлю.
Пакуль салдаты абшуквалі прадпрыемства, Пляц быў яшчэ жывы. На відэазапісае відаць, як ён падымаецца, завязвае на сьцягне нешта падобнае на жгут і накіроўваецца на пост аховы. Ён змог па тэлефоне выклікаць дапамогу, але добраахвотнікі, якія прыехалі, не пасьпелі яго ўратаваць — ён страціў зашмат крыві.
Тэлекампанія CNN зьвярнулася па камэнтар у Міністэрства абароны Расеі, але не атрымала адказу.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
