Паводле Вадзіма Бойчанкі, цяпер у горадзе 150-170 тысяч жыхароў. Да вайны насельніцтва складала звыш 430 тысяч чалавек.
«Акупанты ператварылі Марыюпаль у сярэднявечнае гета. Так што сьмяротнасьць будзе адпаведнай. Без мэдыцыны і мэдычнай дапамогі, аднаўленьня водазабесьпячэньня і належнай каналізацыі ў горадзе выбухнуць эпідэміі. Сёньня большасьць цяперашняга насельніцтва — старыя і хворыя. Без належных умоў сьмяротнасьць сярод уразьлівых груп будзе расьці ў геамэтрычнай прагрэсіі. Некаторыя марыюпальцы з суседніх вёсак вярнуліся ў горад, бо праз жорсткую сыстэму фільтрацыі іх не пускаюць на тэрыторыю свабоднай Украіны. Але расейцы працягваюць генацыд, які пачаўся 24 лютага», — сказаў мэр.
Па словах Бойчанкі, людзі знаходзяцца ў «сьмяротнай небясьпецы», таму неабходна поўная эвакуацыя гораду.
Напярэдадні дарадца мэра Пятро Андрушчанка паведаміў, што на тэрыторыі марыюпальскага заводу «Азоўсталь» засталося ня менш за 100 мірных жыхароў.
10 траўня намесьнік камандзіра палка «Азоў» Сьвятаслаў Паламар адказаў на заяву дарадцы мэра:
«Па-першае, некарэктна казаць пра нейкія лічбы чалавеку, якога тут няма. Усіх мірных жыхароў, якіх мы бачылі, якіх шукалі, з кім падтрымлівалі сувязь, якім прыносілі ваду і ежу, з кім дзяліліся тым, што маем, аказвалі першую дапамогу, мы вывелі».
Пры гэтым ён ня выключыў, што на тэрыторыі «Азоўсталі» ўсё ж можа застацца частка мірных жыхароў. Таксама ў «Азове» назвалі прыблізныя страты насельніцтва Марыюпалю за час вайны — 25 тысяч загінулых.
На «Азоўсталі» таксама застаюцца байцы батальёна «Азоў» і марскія пяхотнікі.
8 траўня прэзыдэнт Украіны Ўладзімір Зяленскі заявіў, што ў цяперашні час немагчыма разблякаваць Марыюпаль ваеннымі сродкамі. Ён дадаў, што Кіеў спрабуе дамагчыся эвакуацыі з дапамогай дыпляматыі. Аднак Масква адмаўляецца абмяркоўваць калідор. У той жа час Украіна залучыла ў перамовы прадстаўнікоў Турэччыны, Ізраілю, Швайцарыі, Францыі, ААН і Міжнароднага камітэту Чырвонага Крыжа.
Марыюпаль быў акружаны расейскімі войскамі ў першыя дні маштабнага ўварваньня, якое пачалося 24 лютага. Украінскія падразьдзяленьні аказваюць супраціў у горадзе на Азоўскім моры ўжо трэці месяц.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
