Міністэрства аховы здароўя Ўкраіны забараніла прымяненьне на тэрыторыі дзяржавы 39 лекавых сродкаў, вытворцы і / або заяўнікі якіх маюць юрыдычны адрас і / або адрас месца дзейнасьці ў Рэспубліцы Беларусь. Тэрмін дзеяньня рэгістрацыйных пасьведчаньняў на гэтыя лекі спынены загадам Міністэрства аховы здароўя Украіны ад 19 сакавіка N 503.
Лекі зь пераліку, якія ўжо ўвезеныя на тэрыторыю Ўкраіны, могуць рэалізоўвацца і ўжывацца ва Ўкраіне да заканчэньня тэрміну іх прыдатнасьці.
Усе беларускія заводы, прадукцыя якіх была прадстаўлена ва Ўкраіне, выпускалі джэнэрыкі, то бок неарыгінальныя лекі. Падобныя лекі вырабляюцца ўкраінскімі фармацэўтычнымі кампаніямі, таму адмова ад беларускіх лекаў не нясе ні пагрозы, ні шкоды для забесьпячэньня ўкраінцаў прэпаратамі, патлумачылі ў Міністэрстве аховы здароўя.
Удзел Беларусі ў вайне супраць Украіны
Зь беларускай тэрыторыі на Ўкраіну вылятаюць расейскія самалёт і бесьпілётнікі, каб бамбаваць гарады, у тым ліку цывільныя аб’екты і мірнае насельніцтва. Сам Лукашэнка раней заяўляў пра тое, што па Ўкраіне расейцы нанесьлі «прэвэнтыўны ўдар», бо ўкраінцы нібыта разьмясьцілі непадалёк ад беларускай мяжы свае ракетныя комплексы і нібыта пагражалі Беларусі. Ва Ўкраіне рашуча адпрэчылі такія абвінавачаньні.
Першым беларускім палітыкам, які заявіў пра тое, што беларуская тэрыторыя апынулася пад расейскай акупацыяй, і таму расейскія войскі свабодна перамяшчаюцца па беларускай тэрыторыі і ўяжджаюць зь яе ва Ўкраіну, стаў старшыня Кансэрватыўна-Хрысьціянскай партыі БНФ Зянон Пазьняк. Пазьней, у сакавіку, Офіс Сьвятланы Ціханоўскай і Народнае антыкрызіснае кіраўніцтва Паўла Латушкі заклікалі міжнародную супольнасьць вызнаць Беларусь тэрыторыяй, якую часова акупавала Расея.
На беларускай чыгунцы з пачатку расейскай ваеннай агрэсіі на Ўкраіну адбыўся шэраг дывэрсій, людзі ламалі чыгуначнае абсталяваньне і затрымлівалі цягнікі з расейскімі зброяй і тэхнікай. Беларускія сілавікі, якія разам з расейскімі вайскоўцамі патрулююць вакзалы і пераезды, затрымалі некалькіх чалавек па падазрэньні ў дывэрсіях. Чыгуначныя саставы са зброяй сталі маскаваць пад трубы і іншае абсталяваньне.
Кіраўнік Украінскай чыгункі Аляксандар Камышын напярэдадні падзякаваў сумленным беларускім чыгуначнікам за зрыў падвозу расейскіх эшалёнаў ва Ўкраіну. Ён не ўдакладніў, што менавіта здарылася, аднак зазначыў, што чыгуначнае спалучэньне паміж Беларусьсю і Ўкраінай больш ня дзейнічае.
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.
