16 сакавіка расейская авіяцыя скінула бомбу на Драматычны тэатар у Марыюпалі, дзе ў сутарэньнях хаваліся сотні мірных жыхароў гораду. Як паведамляе агенцтва Reuters, здымкі зробленыя 14 сакавіка. Надпісы — сьпераду і ззаду будынка.
У Maxar паведамілі, што пашыраць новыя выявы тэатру, як толькі яны зьявяцца, піша ўкраінская служба Свабоды.
Тэатар мог зьмясьціць да 1200 чалавек, паведаміў намесьнік мэра Марыюпалю Сяргей Арлоў. Колькасьць пацярпелых пакуль невядомая.
Былы кіраўнік Данецкай абласной адміністрацыі Сяргей Тарута паведаміў:
«Пасьля жудаснай ночы няпэўнасьці раніцай 22-га дня вайны нарэшце добрая вестка з Марыюпаля! Бамбасховішча захавалася. Завалы пачалі разьбіраць, людзі выходзяць жывымі!»
Мінабароны Расеі абвінаваціла «ультраправы батальён „Азоў“» у падрыве тэатру, ня даўшы гэтаму ніякіх доказаў.
«Мы гэтага ніколі не даруем», — мэр Марыюпаля пра разбурэньне драмтэатру
Мэр Марыюпалю Вадзім Бойчанка пракамэнтаваў напад на Драматычны тэатар і заявіў, што рызыкоўная эвакуацыя жыхароў Марыюпаля з аточанага расейскімі войскамі горада працягнецца.
Бойчанка падкрэсьліў, што эвакуацыя з горада небясьпечная, але ўлады і далей будуць рабіць усё, каб вывезьці як мага больш людзей.
«Рэжыму цішыні не было. Але з горада сталі выпускаць прыватны транспарт. Людзі пайшлі пад абстрэл, пад град і ракеты. За два дні з Марыюпаля выехала 6,5 тысячы асабістых аўтамабіляў. Тых, хто змог даехаць да Бярдзянску, але з розных прычынаў ня змог праехаць далей, везьлі аўтобусы. Частку марыюпальцаў вывезьлі ў Запарожжа. Тут ім акажуць неабходную першую дапамогу», — паведаміў Вадзім Бойчанка.
Расейскія войскі два тыдні трымаюць аблогу Марыюпалю, абстрэльваюць будынкі і аб’екты інфраструктуры, за два тыдні блякады яны дазволілі выехаць з Марыюпалю ў Запарожжа прыблізна дзьвюм тысячам чалавек.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
