ЦВК Туркмэністану сьцьвярджае, што галасаваньне адбылося на «дэмакратычных прынцыпах», а яўка склала 97,17% і свае галасы аддалі 3 362 052 чалавекі.
Пры гэтым 72,97% выбарнікаў, згодна з афіцыйнымі дадзенымі, прагаласавалі за намесьніка старшыні кабінэта міністраў Туркмэністану Сердара Бердымухамедава, сына Гурбангулы Бердымухамедава, які кіраваў дзяржавай са сьнежня 2006 году да 19 лютага 2022-га.
Гурбангулы Бердымухамедаў фармальна заставаўся кіраўніком дзяржавы да абвяшчэньня вынікаў новых выбараў, якія сам жа 64-гадовы кіраўнік і прызначыў. Сын Сердар да таго быў другой асобай у дзяржаве пасьля бацькі, бо ў Туркмэністане прэзыдэнт адначасова кіруе і Кабінэтам міністраў.
Летась Сердару Бердымухамедаву споўнілася 40 гадоў — мінімальны ўзрост для выстаўленьня сваёй кандыдатуры на прэзыдэнцкія выбары ў краіне. Ён скончыў туркмэнскі сельскагаспадарчы ўнівэрсытэт па спэцыяльнасьці «інжынэр-тэхноляг». Пачынаў кар’еру, працуючы ў Асацыяцыі харчовай прамысловасьці Туркмэністану. У 2008 годзе паехаў вучыцца ў дыпляматычную акадэмію МЗС Расеі і адначасова быў прызначаны дарадцам пасольства Туркмэністану ў Маскве. Скончыў вучобу ў 2011 годзе, а потым стаў студэнтам Жэнэўскага цэнтру палітыкі бясьпекі. Адначасова працаваў дарадцам у прадстаўніцтве Туркмэністану пры ААН.
Пасьля вяртаньня са Швайцарыі ў 2013 годзе прызначаны начальнікам аддзелу па эўрапейскіх краінах Міністэрства замежных спраў. Тады ж стаў намесьнікам дырэктара Дзяржаўнага агенцтва кіраваньня і выкарыстаньня вуглевадародных рэсурсаў.
У 2016-м Бердымухамедаў-малодшы стаў дэпутатам парлямэнту, а ў 2018-м — намесьнікам міністра замежных спраў, хаця Выбарчы кодэкс краіны забараняе дэпутатам займаць іншыя пасады. У студзені 2019 году Сердара прызначылі намесьнікам хякіма (кіраўніка) Ахалскага велаяту (адміністрацыйная адзінка, вобласьць у беларускіх найменьнях). Ужо праз паўгода Сердар Бердамухамедаў сам стаў хякімам.
У лютым 2020 году Сердара прызначылі міністрам прамысловасьці і будаўніцтва. Затым ён стаў старшынём Кабінэту міністраў.
Туркмэністан традыцыйна знаходзіцца на апошніх месцах у рэйтынгах свабоды прэсы і грамадзтва. Акрамя таго, Туркмэністан дзеліць з Руандай 2-е месца ў сьвеце па колькасьці зьняволеных на душу насельніцтва (580 чалавек на 100 тысяч грамадзян). Больш толькі ў Злучаных Штатах (629). Паводле праваабаронцаў, многіх грамадзян Туркмэністану адпраўляюць за краты не за крымінальныя злачынствы, а за палітычныя перакананьні.
