Лінкі ўнівэрсальнага доступу

«Мы не зьбіраемся спыняцца». Каго зь беларускіх прапагандыстаў «баняць» у інтэрнэце


Лога тэлеграма
Лога тэлеграма

Тэлеканал «Беларусь 24» выключаюць зь сетак разам з расейскім RT, але пакуль ня ўсюды.

11 сакавіка адміністрацыя мэсэнджара Telegram выдаліла афіцыйны канал беларускага ГУБАЗіКа, вядомы публікацыяй матэрыялаў палітычна матываваных крымінальных спраў і «пакаяльных» відэа затрыманых. Ужо раніцай 12 сакавіка ГУБАЗіК завёў новы, а пра выдаленьне напісаў у адмысловым звароце.

«Бліжэй да паўночы, пакуль па невядомых для нас абставінах, адміністрацыяй „Telegram“ быў выдалены наш тэлеграм-канал „ГУБОП“, — гаворыцца ў паведамленьні. — Мы не зьбіраемся спыняцца на дасягнутых выніках, бо праца ведамства павінна асьвятляцца. Мы працягнем працаваць у патрэбным кірунку, працягнем выконваць ускладзеныя на ведамства задачы».

На новы канал ГУБАЗіКа ўжо падпісалася больш за 10 тысяч карыстальнікаў, гэта прыкладна дзясятая частка аўдыторыі, якую мела старая стужка. Telegram выдаленьне пакуль не пракамэнтаваў. Беларусы неаднаразова зьвярталіся да заснавальніка мэсэнджара Паўла Дурава з заклікамі спыніць публікацыю відэазапісаў з «прызнаньнямі» беларусаў, арыштаваных па палітычных справах.

Антысэміты, Sputnik, RT, «Разумнае галасаваньне»

Канал ГУБАЗіКа ў тэлеграме ня першы, каго «баніць» адміністрацыя мэсэнджара. На пачатку лютага адміністрацыя мэсэнджара правяла перамовы з урадам Нямеччыны, вынікам якіх стаў бан для 64 каналаў, прысьвечаных антысэмітызму і распальваньню расавай варажнечы.

4 сакавіка Telegram заблякаваў каналы расейскага агенцтва Sputnik і расейскамоўнага канала RT.

Пры гэтым у верасьні 2021 году адміністрацыя Telegram заблякавала бот «Разумнага галасаваньня» ў мэсэнджары, патлумачыўшы гэта тым, што мэсэнджар не існуе ізалявана, а залежыць ад іншых кампаній, у тым ліку Apple і Google, якія напярэдадні выбараў заблякавалі прыкладаньні каманды Аляксея Навальнага. Заснавальнік Telegram Павал Дураў тады нават выступіў з адмысловым зваротам з нагоды блякаваньня.

«Паказ праграмаў з удзелам актораў»

Гісторыя з тэлеграм-каналам ГУБАЗіКа — ня першы «міжнародны бан» беларускіх прапагандыстаў. Пасьля пачатку вайны Расеі супраць Украіны шэраг краін-суседак Беларусі паведамілі пра забарону трансьляцыі на сваёй тэрыторыі, акрамя ўласна расейскіх тэлеканалаў, яшчэ і канала «Беларусь 24».

На ім перадаюць выбраныя інфармацыйныя перадачы зь іншых каналаў Белтэлерадыёкампаніі. Да забароны «Беларусь 24» можна было знайсьці ў пакетах кабэльных апэратараў Літвы, Латвіі, Эстоніі, Польшчы і іншых краін. Канал таксама дасяжны праз спадарожнік. Ва Ўкраіне «Беларусь 24» заблякавалі яшчэ ў чэрвені 2021 году праз распальваньне варажнечы.

«Падставай для забароны тэлеканалу стаў паказ у ягоным эфіры праграмаў з удзелам актораў, унесеных Міністэрствам культуры і інфармацыйнай палітыкі Ўкраіны ў пералік асобаў, якія пагражаюць нацыянальнай бясьпецы нашай дзяржавы», — паведамлялі пра забарону «Беларусь 24» украінскія СМІ.

10 сакавіка «Беларусь 24» заблякавалі ў Літве, тое самае зрабіла Эстонія. Паглядзець «Беларусь 24» у Літве немагчыма нават у YouTube, спроба знайсьці там онлайн-трансьляцыю выдае паведамленьне пра тое, што «гэты канал недасяжны ў вашай краіне». Паглядзець яго можна толькі з дапамогай VPN.

Пры гэтым на YouTube застаюцца дасяжнымі каналы БТ, ОНТ і іншых беларускіх дзяржСМІ. Расейскія дзяржаўныя тэлевізійныя каналы YouTube заблякаваў 11 сакавіка.

Па-ранейшаму можна там знайсьці і прыватныя каналы беларускіх прапагандыстаў. У прыватнасьці, старонку Рыгора Азаронка.

Улады Расеі ў адказ на дзеяньні заходніх кампаній абвясьцілі пра блякаваньне з 14 сакавіка сацсетак Facebook і Instagram. Навінаў пра магчымае блякаваньне гэтых рэсурсаў у Беларусі пакуль няма.

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG