Сёньня ў Маскве адбыліся перамовы Аляксандра Лукашэнкі і прэзыдэнта Расеі Ўладзіміра Пуціна. Пра вынікі гэтых перамоваў расказала БЕЛТА прэсавая сакратарка Лукашэнкі Натальля Эйсмант.
«У першачарговым парадку прадметна абмеркавалі сытуацыю ў сьвеце, у рэгіёне, з увагай на Ўкраіну. Адной з асноўных тэмаў у гэтым разрэзе стала хада перамоваў, якія праходзяць у Беларусі, і пазыцыі расейскага і ўкраінскага бакоў. У рамках абмеркаваньня гэтай тэмы на сустрэчу быў запрошаны памочнік прэзыдэнта Расеі Ўладзімір Мядзінскі, а па выніках была агучана супольная думка: пры жаданьні ўкраінскага боку канфлікт можна вырашыць у любы момант».
«Узгаднілі сумесныя крокі па ўзаемнай падтрымцы ў сувязі з санкцыйным ціскам, у тым ліку па цэнах на энэрганосьбіты».
«Дамовіліся аб пастаўках у бліжэйшы час Расеяй у Рэспубліку Беларусь самых сучасных узораў вайсковай тэхнікі. У сваю чаргу, Беларусь павялічыць пастаўкі сучаснай сельскагаспадарчай, пасажырскай тэхнікі і іншай машынабудаўнічай прадукцыі».
«У разьвіцьцё дамоўленасьцяў, дасягнутых сёньня, у панядзелак перамовы ў Маскве правядуць урадавыя дэлегацыі і выпрацуюць канкрэтныя рашэньні па ўсіх пытаньнях, якія абмяркоўваліся».
Паводле Эйсмант, пасьля перамоваў Лукашэнка заявіў, што «Расея пайшла на вельмі сурʼёзныя і беспрэцэдэнтныя крокі па падтрымцы эканомікі нашай краіны».