«Спадары генэралы, дакладайце наверх, што ўварваньне ва Ўкраіну — гэта крывавая авантура, якая загубіць Расею, калі яе не спыніць неадкладна! Украіна — гэта ваш Афганістан. Толькі 10 гадоў да развалу Расеі чакаць не давядзецца! Укладзёмся за месяц! — напісаў у фэйсбуку Антон Герашчанка.
Пра тое, што намесьнік камандуючага 41 агульнавайсковай арміяй Цэнтральнай вайсковай акругі Расеі генэрал-маёр Андрэй Сухавецкі быў забіты падчас вайны з Украінай, паведаміў у Telegram, не назваўшы крыніцы, ваенны карэспандэнт расейскай «Комсомольской правды» Аляксандар Коц, якога лічаць вельмі інфармаваным з расейскага боку.
Гэтую інфармацыю карэспандэнту расейскай службы Радыё Свабода пацьвердзілі таксама ў Кіраўскім абласным аддзяленьні Ўсерасейскай грамадзкай арганізацыі вэтэранаў «Баявое братэрства». Міністэрства абароны Расеі афіцыйна гібелі яго не пацьвярджала.
47-гадовы Сухавецкі быў прызначаны намесьнікам камандуючага войскам увосень 2021 году. Да гэтага ён тры гады камандаваў 7-й дэсантна-штурмавой дывізіяй у Наварасійску. Ён скончыў Разанскую вышэйшую паветрана-дэсантную камандную вучэльню, Вайсковую акадэмію імя Фрунзэ і Акадэмію Генэральнага штабу.
Ён двойчы ўдзельнічаў у «парадзе перамогі» на Краснай плошчы, быў узнагароджаны двума ордэнамі Мужнасьці, ордэнам «За вайсковыя заслугі» і мэдалём «За адвагу». Удзельнічаў у баявых дзеяньнях на Паўночным Каўказе, Абхазіі, Сырыі, быў узнагароджаны за ўдзел у анэксіі Расеяй Крыму.
Ён стаў навышэйшым расейскім вайсковым чынам, пра гібель якога падчас вайны з Украінай стала вядома да 3 сакавіка. Увогуле, як заявіла Міністэрства абароны Расеі вечарам 2 сакавіка, падчас вайны ва Ўкраіне загінулі 498 расейскіх вайскоўцаў, паранены 1597.
Генштаб Украіны між тым паведамляе, што страты асабовага складу арміі Расеі з пачатку маштабнага ўварваньня на тэрыторыю Ўкраіны (з 24 лютага па 4 сакавіка) ўжо складаюць каля 9166 чалавек.
Незалежнага пацьверджаньня зьвестак аб стратах арміі Расеі ва Ўкраіне пакуль няма.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
