Лінкі ўнівэрсальнага доступу

Увечары 1 сакавіка расейскія войскі пацэлілі ракетай у кіеўскую тэлевежу. Прынамсі 5 чалавек загінула
Увечары 1 сакавіка расейскія войскі пацэлілі ракетай у кіеўскую тэлевежу. Прынамсі 5 чалавек загінула

Харкаў і Кіеў пад ракетнымі ўдарамі, Херсон у аблозе. Хроніка вайны Расеі супраць Украіны і рэакцыі ў сьвеце 1 сакавіка

абноўлена

З раніцы 24 лютага Расея вядзе атаку на Ўкраіну, абстрэльвае гарады, у тым ліку жылыя кварталы. Свабода сочыць за падзеямі ў жывым рэжыме.

00:28 2.3.2022

Эўразьвяз дамовіўся адключыць ад SWIFT сем расейскіх банкаў, а таксама накласьці санкцыі на RT і «Спутник»

Амбасадары Эўразьвязу дамовіліся адключыць ад SWIFT сем расейскіх банкаў, а таксама ўхвалілі санкцыі супраць расейскіх мэдыя-карпарацый RT і «Спутник».

Паводле інфармацыі, якую атрымала Радыё Свабода гаворка ідзе пра банкі ВТБ, ВЭБ.РФ, «Открытие», «Новикомбанк», «Промсвязьбанк», «Совкомбанк» і «Банк Россия».

23:58 1.3.2022

МУС Украіны: На ўсходзе краіны без электрычнасьці і харчаваньня засталіся амаль 40 тысяч чалавек

Праз агрэсію Расеі на ўсходзе Украіны каля 40 тысяч чалавек засталіся без сьвятла і харчаваньня, а расейскія вайскоўцы перашкаджаюць эвакуацыі мясцовага насельніцтва, паведаміў міністар унутраных спраў Украіны Дзяніс Манастырскі.

23:45 1.3.2022

МЗС Польшчы ініцыяваў працэс адабраньня расейскай нерухомасьці ў Варшаве

У тым ліку, будынка школы пры пасольстве, гаворыцца ў заяве ведамства.

23:26 1.3.2022

Дзяржсакратар ЗША паставіў пад пытаньне сяброўства Расеі ў Радзе ААН у правах чалавека

Дзяржаўны сакратар ЗША Энтані Блінкен паставіў пад пытаньне сяброўства Расеі ў Радзе ААН у правах чалавека пасьля расейскага ўварваньня на тэрыторыю Ўкраіны.

У відэазвароце да Рады ААН Блінкен назваў дзеяньні Масквы на тэрыторыі суседняй дзяржавы жудасным парушэньнем правоў чалавека.

22:09 1.3.2022

Лукашэнка заявіў, што ўкраінскія ракеты маглі паляцець «у Гомель і Мазыр»

Дзяржаўнае інфармагенцтва БелТА падрабязна пераказала асноўныя моманты прамовы Аляксандра Лукашэнкі на нарадзе з чальцамі Савету бясьпекі, у якой ён спрабаваў патлумачыць сваю падтрымку нападу Расеі на Ўкраіну.

Лукашэнка імкнуўся акцэнтаваць увагу на пагрозах для Беларусі, якія, на ягоную думку, ішлі з тэрыторыі Ўкраіны. Сярод іншага, ён заявіў, што Расея нанесла «апераджальны ўдар» і што «калі б гэтага не зрабілі, гэтыя ракеты прыляцелі б у Гомель і Мазыр».

22:05 1.3.2022

Беларусь і Расею адхілілі ад усіх камандных спаборніцтваў па тэнісе

Міжнародная фэдэрацыя тэнісу (ITF) адхіліла Беларусь і Расею ад сяброўства ў арганізацыі і забараніла ўдзел у камандных спаборніцтвах.​

Таксама адменены турніры ў гэтых краінах, паведамляе прэс-служба ITF.

Пры гэтым беларускім і расейскім спартоўцам дазволена ўдзельнічаць у індывідуальных спаборніцтвах Асацыяцыі тэнісістаў-прафесіяналаў (ATP) і Жаночай тэніснай асацыяцыі (WTA).

21:20 1.3.2022

Маскоўскую радыёстанцыю «Эхо Москвы» ўлады Расеі адключылі ад эфіру.

Пра гэта паведаміў галоўны рэдактар радыё Аляксей Венядзіктаў.​

Раней Генэральная пракуратура Расеі запатрабавала абмежаваць доступ да сайтаў «Эха Москвы» і тэлеканалу «Дождь», паведамляе РБК. Пазьней зьявілася інфармацыя, што амаль усе апэратары ў Расеі ўжо выканалі гэтае патрабаваньне.

20:59 1.3.2022

Ад абстрэлу тэлевежы ў Кіеве загінулі 5 чалавек. Яшчэ 5 атрымалі раненьні

Пра гэта паведамляе ўкраінская дзяржаўная служба надзвычайных сытуацыяў.​

Таксама ў 17:10 снарад, накіраваны на тэлевізійную вежу ў Кіеве, упаў на адлегласьці 200 мэтраў ад тэрыторыі Бабінага Яру. Пра гэта паведаміла Аб’яднаная габрэйская грамада Ўкраіны.

У Бабіным Яры пахавана больш за 100 000 кіяўлян — ахвяраў нацызму, пераважная большасьць іх былі габрэямі.

19:17 1.3.2022

Сакратар РНБА: Украіна мае магчымасьць нанесьці ўдар па тэрыторыі Беларусі, калі будзе загад Зяленскага

«Нашыя войскі сёньня займаюцца зьнішчэньнем расейскай вайсковай тэхнікі і рэсурсаў, якія ёсьць на сёньняшні дзень на тэрыторыі нашай краіны. Пры неабходнасьці, калі будзе прынята рашэньне вярхоўным галоўнакамандуючым зрабіць гэта, яно будзе прынята», — заявіў сакратар Рады нацыянальнай бясьпекі і абароны Ўкраіны Аляксей Данілаў у эфіры тэлеканалу «Украіна 24».

На пытаньне, ці зможа нанесьці Ўкраіна ўдар па тэрыторыі Беларусі ў выпадку прыняцьця прэзыдэнтам Украіны, вярхоўным галоўнакамандуючым Уладзімірам Зяленскім рашэньня, Данілаў адказаў: «Вядома ж».

19:15 1.3.2022

Марыюпаль пад шквалам удараў расейскай рэактыўнай артылерыі

Паранены 21 чалавек, колькасьць загінулых пакуль невядомая.

«Марыюпаль – пад шквалам расейскай рэактыўнай артылерыі. Акупанты наносяць удары па ўсіх раёнах гораду. Абстрэлы не спыняюцца… Па апэратыўнай інфармацыі, ужо вядома пра 21 параненага. Колькі загінулых, пакуль невядома», – напісаў у фэйсбуку начальнік Данецкай абласной вайсковай адміністрацыі Паўло Кірыленка.

18:58 1.3.2022

Польская пракуратура распачала расьсьледаваньне па факце злачынства Расеі — «агрэсіўнай вайны» супраць Украіны

Загад на гэта выдаў 28 лютага міністар юстыцыі Польшчы Зьбігнеў Зёбра.
Сёньня на прэс-канферэнцыі Зёбра паведаміў, што ў нядзелю размаўляў з генэральным пракурорам Украіны Ірынай Венядзіктавай. Паводле яго, Венядзіктава папрасіла польскую пракуратуру ўдзельнічаць у працэсе дакумэнтаваньня «злачынных дзеяньняў», якія адбываюцца ва Украіне.

«У рамках расьсьледаваньня мы задакумэнтуем усе падзеі, якія надалей стануць падставай для прыцягненьня вінаватых у гэтых злачынствах да міжнароднай крымінальнай адказнасьці», — перадае словы кіраўніка польскага Міністэрства юстыцыі PAP.

18:39 1.3.2022

Netflix спыніў працу над расейскімі праектамі

Сярод расейскіх праектаў, якія мелі эксклюзіўна выйсьці на сэрвісе, шэраг праектаў, у тым ліку крымінальны трылер «Затое» беларускай рэжысэркі Дар’і Жук.

18:32 1.3.2022

Жонка расейскага апазыцыйнага палітыка Аляксея Навальнага Юлія выступіла за спыненьне вайсковай агрэсіі Расеі на Украіну

«Пуцін — гэта не Расея! Мы не жадаем нікога бамбіць. Ні ў кога страляць. Нікога заваёўваць. Мы хочам міру. Нас дзясяткі мільёнаў. Мы ня будзем саўдзельнікамі ў ваенным злачынстве. І мы ня будзем маўчаць. Не — вайне!», — напісала Юлія ў інстаграме.

18:18 1.3.2022

Кампанія Exxon Mobil адклікае сваіх спэцыялістаў з расейскіх нафтагазавых праектаў

Пра гэта паведамляе Reuters.

Сярод адкліканых спэцыялістаў супрацоўнікі буйнога прадпрыемства здабычы нафты і газу на востраве Сахалін на Далёкім Усходзе Расеі.

17:43 1.3.2022

Рада дырэктараў Эўрапейскага банку рэканструкцыі і разьвіцьця рэкамэндавала забараніць фінансавую дапамогу Расеі і Беларусі

Кіраўнікі банку маюць 30 дзён, каб прагаласаваць за рэзалюцыю. Для ўвядзеньня санкцыяў супраць Расеі і Беларусі патрэбна 2/3 галасоў «за».

17:33 1.3.2022

Ва Ўкраіне зьявілася першая беларуская рота з добраахвотнікаў

Яна створана пры Кіеўскай тэрытарыяльнай абароне «Азов», паведамляе УНІАН.

17:11 1.3.2022

У Сумскай вобласьці адбыўся першы абмен палоннымі

Кіраўнік Сумскай абласной вайсковай адміністрацыі Дзьмітро Жывіцкі паведаміў аб першым абмене палоннымі.

«Першы абмен палоннымі адбыўся на Сумшчыне. Мы абмянялі нашых пяцёх людзей з тэрытарыяльнай абароны на аднаго расейскага афіцэра вайсковай паліцыі», — напісаў ён.

17:06 1.3.2022

Як цяжарная ўкраінка зь Цярнопалю з трыма дзецьмі ледзь трапіла ў Польшчу. ВІДЭА

Надзея расказала, як ёй удалося праехаць да мяжы, празь месяц ёй нараджаць.

16:58 1.3.2022

Прадстаўнікі ЭЗ, ЗША і Вялікай Брытаніі сыходзяць з выступу Лаўрова на форуме ААН аб правах чалавека

16:52 1.3.2022

Міністэрства абароны Беларусі: Ні пад Чарнігавам, ні пад Кіевам няма і ня можа быць беларускіх вайскоўцаў

Міністэрства абароны Беларусі зьняпраўдзіла прысутнасьць расейскіх войскаў ва Ўкраіне.

«Міністэрства абароны неаднойчы заяўляла, што ўсе беларускія вайскоўцы знаходзяцца на тэрыторыі Беларусі. У пунктах пастаяннай дысьлякацыі. І не бяруць удзелу ў спэцыяльнай апэрацыі на Данбасе», — сказала афіцыйная прадстаўніца Міністэрства абароны Іна Гарбачова. Яе словы цытуе БелТА.

Беларускія афіцыйныя ведамствы вайну ва Ўкраіне, падчас якой расейскія войскі заходзяць ва Ўкраіну ў тым ліку з тэрыторыі Беларусі, працягваюць называць «спэцыяльнай апэрацыяй на Данбасе».

З раніцы 1 сакавіка пачала распаўсюджвацца інфармацыя, што пад Чарнігавам заўважылі беларускую тэхніку. Афіцыйна гэтая інфармацыя пакуль не пацьвердзілася.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG