— Сяргей, скажыце спачатку, дзе вы знаходзіцеся. Як далёка вы ад Кіева?
— Буча, дзе я жыву, гэта, па сутнасьці, прадмесьце Кіева. Да цэнтру Кіева ад нас — кілямэтраў 25–30. А да гарадзкой мяжы Кіева — недзе кілямэтраў 10. Наш будынак на самым ускрайку Бучы, недалёка ад аэрапорта Гастомель, які атакавалі і, магчыма, будуць атакаваць яшчэ.
Учора раніцай наш будынак трошкі зачапіла снарадам. Мы ў гэты час начавалі ў іншым месцы, вярнуліся з рэчамі і ўбачылі, што будынак зачапіла…
— Той будынак, дзе ваша кватэра?
— Так, шматпавярховы…
— А ці ёсьць там у вас нейкае бамбасховішча, дзе людзі могуць пераначаваць, калі ня хочуць заставацца ў сваёй кватэры?
— Калі не ва ўсіх, то ў многіх будынках ёсьць падвалы. Як усё пачалося, то мы сядзелі ў падвале побач са сваім домам, а потым ужо перабраліся да знаёмых.
— Гэтую апошнюю ноч вы правялі ў знаёмых, як разумею?
— Так, калі ў наш будынак пацэлілі, мы пераехалі ў іншы раён гораду.
— А як выглядае справа з жыльлёвай інфраструктурай у вас — ці ёсьць электрычнасьць, вада?
— Калі гаварыць пра гэты наш будынак, які побач з аэрапортам, то там адразу адключылі газ. Вада ёсьць, электрычнасьць ёсьць — прынамсі, да апошняга часу былі, цяпер ня ведаю…
— А што вы чуеце за вакном цяпер — нейкае водгульле бою ці, можа, спакойна?
— Хвілін 10–15 таму моцна біла артылерыя. Ня ведаю па чым, але знаёмыя сказалі па тэлефоне, што нібыта зноў высадзіўся дэсант у Бучы і атакуе з боку Беларусі. Я падазраю, што гэта фігачаць калёну, якая ідзе ў наш бок…
— Каб нашы чытачы больш-менш арыентаваліся геаграфічна, скажыце нам: ваша Буча зь якога боку Кіева?
— Гэта паўночны захад. А Гастомель крыху на поўнач ад Бучы. Учора і пазаўчора яны ішлі з боку Беларусі і намагаліся адтуль атакаваць. Таму што там на ўскраіне Бучы стаіць разьбітая расейская тэхніка: БТРы, грузавікі. Іх, відаць, разбамбіла артылерыя, і з паветра накрылі.
— А што людзі ў вас цяпер гавораць?
— Гавораць, што ўчора схапілі дывэрсанта ў цэнтры гораду. Сёньня ў суседнім пасёлку схапілі марадэраў. Кажуць, што вось цяпер у нас высадзіўся дэсант, але гэта не пацьверджаная інфармацыя. Ніякіх фота і відэа няма.
— Вы ня думаеце зьяжджаць адтуль? Застаняцеся там, пад Кіевам?
— Мы пакуль што застаемся, бо мы ў параўнальна аддаленым раёне. Гэта па-першае. Па-другое, зараз кудысьці перасоўвацца няма на чым, а знайсьці машыну нерэальна, бо ўсе, хто мог, ужо зьехалі. У Кіеў ехаць я таксама ня бачу сэнсу. Таму мы пакуль што тут, а далей будзем глядзець.
— Як я разумею, калі пачалася вайна, то і школы закрылі?
— Так, усё закрыта: садкі, школы… Супэрмаркет у нас у цэнтры зачынены…
— А іншыя прадуктовыя крамы адчыненыя? Ці ёсьць дзе купіць ежу?
— На нашым раёне — гэта такі кампактны жылы комплекс, дзе ўсе ўсіх ведаюць, — крама працуе. Як разумею, краму трымае мясцовая жыхарка і адчыняе яе, як для сваіх, так сказаць. Там можна купіць усё што трэба.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
