Лінкі ўнівэрсальнага доступу

У Літве і Ўкраіне адрэагавалі на расейскія войскі ў Беларусі: гэта высокі ўзровень ваеннай пагрозы


Ілюстрацыйная выява. Расейская дэлегацыя на вучэньнях «Захад-2021»
Ілюстрацыйная выява. Расейская дэлегацыя на вучэньнях «Захад-2021»

Прадстаўнік галоўнага ўпраўленьня выведкі Ўкраіны Вадзім Скібіцкі заявіў, што перакіданьне расейскіх войскаў у Беларусь і ўзмацненьне сухапутнага і супрацьпаветранага кампанэнту сьведчаць аб высокім узроўні ваеннай пагрозы зь беларускага кірунку.

«Зьявілася яшчэ адна пагроза, і мы лічым, што гэта павышэньне ўзроўню пагрозы, — гэта разгортваньне груповак войскаў на тэрыторыі Беларусі. У чым пагроза? У тым, што на тэрыторыі Беларусі рагортваецца паўнавартасная групоўка войскаў, якая будзе мець паветраны і сухапутны кампанэнт. Ня выключана, што будзе ўзмоцнена і супрацьпаветраная абарона», — заявіў Вадзім Скібіцкі ў эфіры тэлеканалу «Настоящее время».

Прадстаўнік украінскай выведкі дадаў, што вайсковыя сілы ўжо правялі разьведку для разгортваньня вялікай групоўкі паветрана-дэсантных войскаў Сіл спэцыяльных апэрацый Беларусі з удзелам падразьдзяленьняў Узброеных сіл Расеі.

Вадзім Скібіцкі дадаў, што на сёньня паблізу межаў Украіна Расея сканцэнтравала 106 тысяч вайскоўцаў і працягвае нарошчваць іхную прысутнасьць.

«Расея цяпер актыўна перакідвае войскі з Усходняй вайсковай акругі для ўдзелу ў вучэньнях „Саюзная рашучасьць“. Паводле нашай інфармацыі, таксама будуць перакідваць асобныя групы Другой арміі — яны ўвойдуць або на тэрыторыю Беларусі, або застануцца на мяжы на тэрыторыі Расеі. На сёньняшні дзень Расея перакідвае ў эўрапейскую частку Расеі падразьдзяленьні з усіх акругаў — Заходняй, Цэнтральнай і Ўсходняй», — патлумачыў Вадзім Ськібіцкі.

Міністар замежных справаў Украіны Дзьмітро Кулеба на сваёй старонцы ў Twitter заклікаў украінцаў не панікаваць:

«Гады расейскай агрэсіі навучылі: эскаляцыя заўсёды ідзе ў камплекце з інфармацыйным нагнятаньнем. Мэта — зрабіць нас больш слабкімі ўнутры (краіны). Не рэагуйце на „інфастрашылкі“. Войскі і дыпляматыя надзейна абароняць Украіну. Украінцы перамагаюць з гарачым сэрцам, але з халоднай галавой».

У той жа час у сувязі з эскаляцыяй вакол Украіны парлямэнцкая апазыцыя патрабуе тэрмінова склікаць пасяджэньне Вярхоўнай Рады Ўкраіны.

Літва: наўпроставая пагроза Расеі з тэрыторыі Беларусі

У Літве перакіданьне расейскіх войскаў у Беларусь таксама разглядаюць як непасрэдную пагрозу сваёй краіне.

«У сытуацыі, што склалася, мы разглядаем увядзеньне расейскіх узброеных сіл у Беларусь ня толькі як фактар, які дэстабілізуе сытуацыю зь бясьпекай, але і як яшчэ большую наўпроставую пагрозу для Літвы», — працытавала Delfi.lt міністра абароны Літвы Арвідаса Анушаускаса.

Пагроза нападу Расеі на Ўкраіну

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG