Лінкі ўнівэрсальнага доступу

«Пастаўкі інструмэнтаў рэпрэсій у Беларусь». Апублікавалі справаздачу аб незаконным выкарыстаньні зброі для разгонаў пратэстаў


Беларускія сілавікі са зброяй падчас маршу пратэсту 1 лістапада 2020 году
Беларускія сілавікі са зброяй падчас маршу пратэсту 1 лістапада 2020 году

У дакладзе аналізуецца менш сьмяротная і агнястрэльная зброя, якая выкарыстоўваецца беларускімі сіламі бясьпекі для задушэньня мірных пратэстаў, а таксама яе закупкі і прымяненьне.

Міжнародная праваабарончая арганізацыя (FIDH) падрыхтавала даклад «Пастаўкі інструмэнтаў рэпрэсій у Беларусь» аб незаконным выкарыстаньні зброі для разгонаў дэманстрацый у парушэньне правоў чалавека.

У апублікаваным дакумэнце, сярод іншага, аналізуецца менш сьмяротная зброя замежнай вытворчасьці і агнястрэльная зброя, якая выкарыстоўваецца сіламі бясьпекі Беларусі для задушэньня мірных пратэстаў; прыводзіцца агляд магчымых шляхоў іх паставак і прымяненьня, а таксама аналізуюцца шляхі прыцягненьня да адказнасьці дзяржаў і кампаній.

«Пасьля жорсткіх разгонаў пратэстаў у Беларусі [пачынаючы з жніўня 2020 году], журналісты і арганізацыі грамадзянскай супольнасьці задакумэнтавалі выкарыстаныя патронныя гільзы з гумавымі кулямі, сьвятлашумавыя і іншыя боепрыпасы, якія ўжываліся супраць пратэстоўцаў, вырабленыя ў асноўным у Расеі і краінах Эўразьвязу. Акрамя таго, супрацоўнікі атрадаў асаблівага прызначэньня былі ўзброеныя агнястрэльнай зброяй замежнай вытворчасьці, якая, магчыма, была дастаўленая ў Беларусь у парушэньне эмбарга ЭЗ на пастаўкі зброі ў Беларусь ад 2011 г. і іншых міжнародных абавязаньняў», — гаворыцца ў кантэксьце даклада FIDH.

«Праваабарончы цэнтар «Вясна» і іншыя арганізацыі грамадзянскай супольнасьці зафіксавалі пранікальныя агнястрэльныя раненьні, пераломы касьцей, страту зроку і іншыя сур’ёзныя траўмы, — зазначае Павал Сапелка, юрыст праваабарончага цэнтру «Вясна», сябра FIDH у Беларусі. — Непрапарцыйнае прымяненьне сілы супраць мірных пратэстоўцаў зьяўляецца непрымальным абмежаваньнем права на мірныя сходы і права на свабоду выказваньня думак. Важна, каб рэжым Лукашэнкі не карыстаўся прамой ці ўскоснай падтрымкай гвалту з-за мяжы, няхай гэта будзе з боку дзяржаў або прыватных кампаній».

У дакладзе аналізуецца менш сьмяротная і агнястрэльная зброя, якая выкарыстоўваецца беларускімі сіламі бясьпекі для задушэньня мірных пратэстаў, а таксама яе закупкі і прымяненьне. У дакладзе падрабязна апісана дастасавальная прававая база для выкарыстаньня і перадачы зброі для задушэньня масавых беспарадкаў і агнястрэльнай зброі, вызначаны тыпы зброі, дадзены кароткі аналіз таго, ці парушае яе перадача дастасавальнае заканадаўства, і пазначаны магчымыя шляхі прыцягненьня да адказнасьці дзяржаў і карпарацый.

Ахвяры беларускіх пратэстаў. Што важна ведаць

Аляксандар Тарайкоўскі, Аляксандар Віхор, Генадзь Шутаў і Раман Бандарэнка (зьлева направа)
Аляксандар Тарайкоўскі, Аляксандар Віхор, Генадзь Шутаў і Раман Бандарэнка (зьлева направа)

За ўвесь час пратэстаў пры розных абставінах загінулі сама меней 4 чалавекі. Пры гэтым улады і кіраўніцтва МУС ні разу не прызналі, што людзі загінулі ад рук сілавікоў. Гэтыя людзі на сёньня лічацца ахвярамі пратэстаў:

  • Аляксандар Тарайкоўскі, 34 гады, Менск, застрэлены сілавікамі на вуліцы Прытыцкага;
  • Аляксандар Віхор, 25 гадоў, Гомель, памёр пасьля зьбіцьця ў міліцыі;
  • Генадзь Шутаў, 43 гады, Берасьце, застрэлены сілавіком;
  • Раман Бандарэнка, 31 год, Менск, пабіты да непрытомнасьці, памёр у шпіталі.

Таксама дагэтуль невядомыя абставіны сьмерці яшчэ некалькіх чалавек. Іх сваякі і сябры лічаць, што яны маглі быць забітыя падчас пратэстаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG