«Ведаеце, як я правёў навагоднія сьвяты? Мяне абвясьціў у вышук беларускі КДБ. І я адкрыю вам таямніцу: гэта не было маё навагодняе жаданьне. Не было такога, каб я загадаў апошні айфон, апошні макбук і апошні раз праехаць праз гушчар, толькі ўжо ў багажніку», — так пачаў свой стэндап Слава Камісаранка.
Паводле яго, прычынай вышуку сталі ягоныя жарты пра Лукашэнку і сытуацыю ў Беларусі.
«У звычайных краінах спэцслужбы ловяць тэрарыстаў, а ў Беларусі — прыкалістаў, таму што ў Беларусі прыкаліст павінен быць адзін», — пракамэнтаваў Камісаранка.
Камісаранка расказаў са сцэны, што яму напісаў чалавек, «зьвязаны зь беларускімі пратэстамі», што мае інфармацыю з надзейных крыніц, што Камісаранку зьбіраюцца выкрасьці ў Маскве і вывезьці на машыне ў Беларусь.
У сваім фэйсбуку Слава Камісаранка ў дадатак зьмясьціў допіс аб тым, што супрацоўнікі КДБ «тэлефанавалі, пісалі [яму] эсэмэскі»: «Праўда зайсьці да мяне ў інстаграм, каб убачыць 10 афішаў з Кіева і зразумець, што я не ў Маскве, не здагадаліся».
Слава Камісаранка — вядомы стэндап-комік, жыве ў Маскве. Штогод даваў канцэрты ў розных гарадах Беларусі. Летась праз пандэмію каранавірусу графік выступаў пасунулі з 21 і 25 лістапада на 10 і 11 красавіка гэтага году. Камісаранка неаднаразова выказваўся пра фальсыфікацыю вынікаў прэзыдэнцкіх выбараў у Беларусі і асуджаў гвалт з боку сілавікоў. У пачатку 2021 году яму забаранілі выступаць у Менску, ануляваўшы гастрольныя пасьведчаньні.
