Лінкі ўнівэрсальнага доступу

Прэм’ер-міністар Судану сышоў у адстаўку на фоне масавых пратэстаў


Пратэсты ў Судане, 30 сьнежня 2021

Прэмʼер-міністар Судану Абдала Хамдук 2 студзеня заявіў пра сыход у адстаўку на фоне палітычнага крызісу і масавых вулічных пратэстаў супраць улады вайскоўцаў.

У тэлезвароце прэмʼер заявіў, што яго адстаўка дасьць шанец выйсьці з тупіку і сфармаваць новы кабінэт міністраў. У той самы дзень у Хартуме і Амдурмане, калі разганялі дэманстрацыі прыхільнікаў дэмакратычных пераўтварэньняў, забілі ня менш як двух чалавек.

У кастрычніку вайскоўцы фактычна адхілілі Хамдука ад улады, затрымаўшы шэраг міністраў ягонага ўраду. На фоне масавых пратэстаў празь месяц было падпісанае палітычнае пагадненьне паміж фактычным кіраўніком краіны генэралам Абдэль Фатахам аль-Бурханам і прэмʼер-міністрам, які вярнуўся да выкананьня абавязкаў. Аднак Хамдуку так і не ўдалося сфармаваць новы кабінэт наўзамен ранейшага, распушчанага вайскоўцамі.

Пасьля таго як два гады таму скінулі аўтарытарнага прэзыдэнта Амара аль-Башыра, Суданам кіруе Сувэрэнная рада, у якую ўваходзяць як вайскоўцы, так і цывільныя асобы. Яе заданьне — падрыхтаваць умовы для правядзеньня свабодных выбараў. Вайскоўцы абяцалі не перашкаджаць выбарам. Нядаўні пераварот яны абгрунтавалі імкненьнем устанавіць парадак на час пераходнага пэрыяду.

Кіраўнік Сувэрэннай рады генэрал Бурхан па-ранейшаму запэўнівае, што Судан працягне рух да дэмакратыі. Аднак удзельнікі вулічных пратэстаў ня вераць гэтым абяцаньням.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG