Лінкі ўнівэрсальнага доступу

Што варта ведаць пра вайсковы пераварот у Судане


Дэманстранты, якія выступаюць супраць вайсковага перавароту, блякуюць вуліцу ў Хартуме, 25 кастрычніка 2021 г.

У Судане вайскоўцы арыштавалі прэм’ер-міністра і распусьцілі кабінэт міністраў. Пераварот устрывожыў многія дзяржавы, якія нядаўна пачалі наладжваць адносіны з Суданам пасьля шматгадовай ізаляцыі краіны.

Што насамрэч адбылося і чаму? Тлумачым у пяці пунктах.

1. Што папярэднічала перавароту?

Пасьля таго як у 2019 годзе быў зрынуты аўтарытарны прэзыдэнт Амар аль-Башыр, які кіраваў Суданам 30 гадоў, уладу падзялілі паміж сабой вайскоўцы і цывільныя палітыкі, кіруючы краінай пры дапамозе так званай Сувэрэннай рады. Аднак Сувэрэнная рада стала месцам пастаянных спрэчак і канфліктаў паміж прадстаўнікамі арміі і цывільнай адміністрацыі.

2. Што стаіць за сёньняшнім напружаньнем?

Вайсковыя лідэры ў Сувэрэннай радзе патрабавалі рэформаў ад сваіх цывільных калегаў і заклікалі зьмяніць кабінэт міністраў, які цяпер няздольны рэфармаваць эканоміку і абнавіць краіну. Цывільная частка рады адхіляла гэтыя патрабаваньні. У сваю чаргу, прэмʼер-міністар Абдала Хамдок абвінавачваў у праблемах краіны прыхільнікаў Башыра, многія зь якіх, як лічыцца, застаюцца яшчэ ў арміі, спэцслужбах і іншых дзяржаўных установах.

3. Магчымасьць палітычнага кансэнсусу

Яна невялікая. У сёньняшнім Судане ня менш за 80 палітычных партый. У папярэднія дзесяцігодзьдзі расколы і няздольнасьць палітычных партый дамагчыся кансэнсусу раз за разам адкрывалі шлях для ўмяшаньня вайскоўцаў, якія арганізоўвалі перавароты, матывуючы іх навядзеньнем парадку.

4. Што цяпер адбываецца?

Кіраўнік Сувэрэннай рады выступіў з прамовай, у якой абвясьціў надзвычайнае становішча і распусьціў як кабінэт, так і самую раду. Адзін з вайсковых лідэраў, генэрал Абдэль Фатах Абдэльрахман Бурхан, заявіў, што выбары ў краіне пройдуць у ліпені 2023 году. Дзяржаўныя тэлевізія і радыё апынуліся пад кантролем вайскоўцаў. У краіне абмежавалі карыстаньне інтэрнэтам.

5. Што можа адбыцца далей?

Як паведамляецца на старонцы Міністэрства інфармацыі ў Facebook, прэмʼер-міністар заклікаў людзей выступіць у падтрымку ўраду. У сталіцы краіны, Хартуме, адбываюцца вулічныя дэманстрацыі. Камэнтатары нагадваюць, што ў чэрвені 2019 году, да таго як быў дасягнуты кампраміс адносна дэмакратычнага пераходу ўлады, салдаты адкрылі агонь па дэманстрантах у Хартуме, у выніку чаго загінулі ня менш як 87 чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG