Лінкі ўнівэрсальнага доступу

ЭСПЧ часова забараніў Расеі выдаваць Дзьмітрыя Падлобнікава Беларусі. Ён застаецца ў расейскім СІЗА


ілюстрацыйнае фота

Эўрапейскі суд у правах чалавека да 31 студзеня 2022 году забараніў Расеі выдаваць на радзіму беларуса Дзьмітрыя Падлобнікава.

Пра гэта паведаміў у сваім тэлеграм-канале кіраўнік прававых праграм Маскоўскай Хэльсынскай групы Раман Кісялёў.

«Мы атрымалі 39 правіла Эўрапейскага суда аб часовых мерах — суд забараніў выдачу да 31 студзеня! Спрабуем да ўсіх дастукацца, каб улады былі ў курсе, і яго ня вывезьлі да гэтай даты», — напісаў праваабаронца.

Паводле Кісялёва, Дзьмітры Падлобнікаў па-ранейшаму знаходзіцца ў Расеі, у СІЗА-4. У Беларусі яго падазраюць у «групавых дзеяньнях, якія груба парушаюць грамадзкі парадак» (ч. 1 арт. 342 КК РБ, максымальнае пакараньне — да 4 гадоў пазбаўленьня волі) і «гвалце альбо пагрозе гвалтам у дачыненьні да міліцыянта» (артыкул 364 КК РБ, да 7 гадоў пазбаўленьня волі).

28 сьнежня адвакатка Марыя Красава распавяла «Медыязоне», што Падлобнікава вывезьлі з СІЗА і выказала меркаваньне, што яго могуць экстрадаваць у Беларусь.

25-гадовы Дзьмітры Падлобнікаў выходзіў на акцыі пратэсту супраць фальсыфікацыі выбараў у Жлобіне. Яго затрымалі 9 жніўня 2020 году, пратрымалі тры дні ў Петрыкаўскім РАУС і адпусьцілі на волю. Пазьней ён выехаў на працу ў Расею, аднак у траўні 2021 году быў затрыманы там на запыт рэжыму Лукашэнкі. Дзьмітры чакаў пастановы аб экстрадыцыі ў СІЗА Каломны, нядаўна яго перавезьлі ў адзін з маскоўскіх СІЗА.

Ад жніўня 2020 году ў Расеі арыштавалі прынамсі два дзясяткі беларусаў у справах, зьвязаных з пратэстамі супраць рэжыму Лукашэнкі. Некаторых ужо выслалі на радзіму, іншых чакае экстрадыцыя ці дэпартацыя. Масква рэдка адмаўляе Менску і дазваляе затрыманьні на сваёй тэрыторыі беларускім сілавікам. Журналісты выявілі экстрадыцыйныя справы, пра якія ня ведаюць нават праваабаронцы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG