Рашэньне прынялі пасьля станоўчага тэсту гульца моладзевай зборнай Расеі, што запатрабавала б адмены гульні Расея — Славаччына, заплянаванай на 29 сьнежня. Гульня стала трэцяй, якую адмянілі праз хваробу, пасьля матчаў Швайцарыя — ЗША і Фінляндыя — Чэхія.
У дадатак да мэтаў гарантаваньня здароўя і бясьпекі ўдзельнікаў Рада вызначыла, што праз чарговую адмену — трэцяй гульні за два дні — спартовая цэласнасьць спаборніцтваў парушылася і турнір мае быць адменены.
«Разам з камандамі мы прыбылі на турнір з поўнай упэўненасьцю ў пратаколах COVID-19, створаных IIHF, LOC, Alberta Health, Alberta Health Services і Агенцтвам грамадзкай аховы здароўя Канады, — сказаў прэзыдэнт IIHF Люк Тардыф. — Бягучы распаўсюд COVID-19 і варыянт „Омікрон“ прымусілі нас амаль адразу пасьля прыбыцьця карэктаваць нашы пратаколы, каб паспрабаваць папярэдзіць любы патэнцыйны распаўсюд. Гэта ўключала штодзённае тэставаньне і патрабаваньне карантыну ў камандзе, калі пацьвярджаліся станоўчыя выпадкі».
Тардыф дадаў, што арганізатары стваралі камандам-удзельніцам умовы, неабходныя для гэтага мерапрыемства, аднак гэтага было недастаткова.
«Цяпер нам патрэбен пэўны час засяродзіцца на тым, каб усе гульцы і пэрсанал бясьпечна вярнуліся дадому».
Моладзевы чэмпіянат сьвету – 2022 пачаўся ў сьнежні 2021-га і мусіў скончыцца ўжо ў студзені 2022-га, ён праходзіў у Канадзе ў двух гарадах Эдмантан і Рэд Дыр. У ім бралі ўдзел 10 зборных.
