Генэральная пракуратура Расеі настойвала, што арганізацыя сыстэматычна парушала закон аб замежных агентах. На выніковым паседжаньні прадстаўнік ведамства заявіў, што арганізацыя «стварае фальшывы вобраз СССР як тэрарыстычнай дзяржавы, абяляе і рэабілітуе нацысцкіх злачынцаў».
Праваабаронцы лічаць, што для ліквідацыі арганізацыі не было законных падставаў. Сотні расейскіх і замежных дзеячоў культуры, нобэлеўскія ляўрэаты, а таксама журналісты падпісалі зварот на імя прэзыдэнта Расеі Ўладзіміра Пуціна з просьбай спыніць перасьлед арганізацыі.
Старшыня праўленьня «Мэмарыялу» Ян Рачынскі заявіў, што рашэньне будзе абскарджана, а таварыства ня можа спыніць працу, бо ў яго ёсьць структуры, якія не маюць юрыдычнай асобы.
«Мэмарыял» — адна з найстарэйшых праваабарончых арганізацый у Расеі. Таварыства створана ў студзені 1989 году. Яго першым старшынём быў ляўрэат Нобэлеўскай прэміі міру акадэмік Андрэй Сахараў.
Арганізацыя больш за 30 гадоў вяла дасьледаваньні савецкіх рэпрэсіяў і стварыла падрабязную базу зьвестак з імёнамі рэпрэсаваных. Адвакат таварыства Генры Рэзьнік на пасяджэньні ў аўторак адзначыў, што арганізацыя «садзейнічае здароўю нацыі».
- Каля будынка Вярхоўнага суду ў цэнтры Масквы сабралася невялікая група людзей, якія падтрымліваюць арганізацыю падчас працэсу. Яны скандавалі: «Ганьба». Паліцыя адціснула прысутных і затрымала некалькіх чалавек.
- У сераду, 29 сьнежня, суд разгледзіць пазоў пракуратуры аб ліквідацыі ўнесенага ў сьпіс замежных агентаў Праваабарончага цэнтру «Мэмарыял». Ён зьяўляецца членам «Міжнароднага Мэмарыялу», але мае асобную юрыдычную асобу.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў