Інфармацыя пра затрыманьне вэнчурнага інвэстара, дырэктара кампаніі Aivitam Дзьмітрыя Досава зьявілася 13 сьнежня. Аднак, як удалося высьветліць рэсурсу dev.by, насамрэч яго забралі 10 сьнежня, а на волю ён выйшаў 25-га.
Дзьмітры Досаў у размове з журналістамі інтэрнэт-выданьня ўдакладніў, што ў той дзень да яго дадому ўварваліся «чалавек восем зь пісталетамі і шчытамі».
Падчас ператрусу нічога не знайшлі, але забралі тэлефон, ноўтбук і адвезьлі ў ГУБАЗіК. І ўжо там наткнуліся на адзін рэпост у асабістыя паведамленьні з сайту Zerkalo.io. Гэта быў артыкул пра бізнэс.
Кіраўніка ІТ-кампаніі асудзілі на 15 содняў паводле арт. 19.11 ч. 2 КаАП — «распаўсюд інфармацыйнай прадукцыі, уключанай у сьпіс экстрэмісцкіх матэрыялаў».
