Лінкі ўнівэрсальнага доступу

Навіны палітвязьняў: адміністрацыя турмы забараняе іншым вязьням размаўляць з Бабарыкам; у Беларусі 8 новых палітвязьняў


Палітвязень Віктар Бабарыка ў судзе. Менск, 17 лютага 2021 году

У Беларусі на 28 сьнежня праваабаронцы прызналі палітвязьнямі 962 чалавекі.

Бабарыку прыгразілі пазбавіць сустрэч з роднымі, калі не прышчэпіцца «Спутником»

Каманда асуджанага прэтэндэнта ў прэзыдэнты Віктара Бабарыкі падзялілася навінамі ад палітвязьня.

Так, зь ліста на волю вынікае, што адміністрацыя забараняе іншым вязьням размаўляць зь ім.

«Што тычыцца майго дня народзінаў (быў яшчэ 9 лістапада. — РС), то ўсё было ціха і спакойна. Вы мусілі чуць, што ў гэтым месцы ўсім арыштантам забараняецца кантактаваць са мной. Таму нічога не было і нічога смачнага ня еў», — напісаў Віктар Бабарыка.

Ён таксама адзначыў, што празь непрыхаваны шантаж вымушаны быў зрабіць прышчэпку расейскай вакцынай.

«Што да прышчэпкі супраць COVID-19, дык я быў вымушаны яе зрабіць, бо пужалі адмовай ад сустрэчы з роднымі. Таму атрымаў „Спутник V“ і ўсё ж выжыў», — іранізуе палітзьняволены.

Свой побыт у калёніі Віктар Бабарыка параўноўвае з «днём сурка» — штодня паўтараецца адна і тая ж карціна.

«Нічога не зьмянілася, жыву, як у мастацкай стужцы „Дзень сурка“. Толькі герой культавага кіно меў магчымасьць разьвівацца, а ў гэтым месцы з інтэлектуальным разьвіцьцём вядзецца барацьба», — падсумаваў ён.

Віктар Бабарыка асуджаны на 14 гадоў зьняволеньня ў калёніі ўзмоцненага рэжыму. Адбывае пакараньне ў Наваполацку.

Палітзьняволенай Вользе Гарбуновай не надаюць мэдычную дапамогу ў СІЗА

Вольга Гарбунова, экс-кіраўніца арганізацыі «Радзіслава», што дапамагае жанчынам, пацярпелым ад хатняга гвалту, захварэла ў СІЗА, але ёй не надаюць мэдычную дапамогу, паведаміла яе сяброўка Вольга Ланеўская.

«Воля хварэе, і яе (і ня толькі яе) на Валадарцы ня лекуюць. Моцна кашляе, баліць горла, з носу цячэ», — напісала Ланеўская ў Фэйсбуку.

У камэнтары Reform.by яна дадала, што ў цэлым Гарбунова трымаецца бадзёра, але хвалюецца за ўсіх блізкіх, якія знаходзяцца ў Беларусі. Лісты ёй даходзяць ня ўсе.

Вольгу Гарбунову затрымалі 9 лістапада. Амаль 2 тыдні яна трымала галадоўку на знак пратэсту. Празь 10 дзён яе перавялі з Акрэсьціна ў СІЗА № 1 на вуліцы Валадарскага ў Менску. Ёй выставілі абвінавачаньне паводле двух артыкулаў Крымінальнага кодэксу: ч. 1, 2 і 3 арт. 293 (аб масавых беспарадках) і ч. 1 і 2 арт. 342 КК (аб арганізацыі і падрыхтоўцы дзеяньняў, якія груба парушаюць грамадзкі парадак, або актыўным удзеле ў іх). Гарбуновай пагражае да 15 гадоў калёніі. Актывістку прызналі палітзьняволенай.

Калі Вольга была за кратамі, у яе памёр бацька.

Палітвязьня Андрэя Царонка перавялі на строгі турэмны рэжым

Праваабаронцам стала вядома, што ў канцы сьнежня 49-гадовага палітвязьня Андрэя Царонка перавялі на строгі турэмны рэжым у горадзенскую турму № 1 з папраўчай калёніі № 20, піша «Вясна». Строгі турэмны рэжым уключае толькі штомесячную квоту ў 1 базавую велічыню на пакупкі; адно кароткатэрміновае спатканьне ў год; адна бандэроль або адзін дробны пакет у год і штодзённая прагулка цягам 1 гадзіны.

Андрэя Царонка асудзілі на 4 гады калёніі паводле ч. 1 арт. 339 (хуліганства) і 364 КК (гвалт у дачыненьні да міліцыі). Згодна з вэрсіяй абвінавачаньня, Царонак увечары 23 верасьня, калі ў Менску праходзіла акцыя пратэсту супраць інаўгурацыі Лукашэнкі, перакрыў праезную частку каля станцыі мэтро «Пушкінская», а таксама пашкодзіў два патрульныя аўтамабілі і напаў на двух інспэктараў ДАІ. Палітвязень віны не прызнаў.

У Беларусі 8 новых палітвязьняў. Агулам — ужо 962

Беларускія праваабаронцы прызналі палітвязьнямі яшчэ 8 чалавек, пазбаўленых волі за абразу Лукашэнкі, прадстаўнікоў улады (супрацоўнікаў міліцыі), судзьдзяў і зьнявагу дзяржаўных сымбаляў. Гэта:

  1. Іван Хвяшчук, асуджаны па арт. 368 КК за абразу А. Лукашэнкі на 1 год калёніі;
  2. Максім Мычко, асуджаны па арт. 370 КК за сарваны дзяржаўны сьцяг на 1 год калёніі;
  3. Аляксандар Бендзь, асуджаны па арт. 370 КК за сарваны дзяржаўны сьцяг на 1 год калёніі;
  4. Валянцін Лабачоў, па арт. 368 КК за абразу А. Лукашэнкі на 1 год калёніі;
  5. Аляксандар Васін, асуджаны па арт. 368 КК за абразу А. Лукашэнкі на 1 год і 6 месяцаў «хіміі»;
  6. Андрэй Андрэеў, асуджаны па арт. 369 КК за абразу прадстаўніка ўлады на 1 год і 6 месяцаў «хіміі»;
  7. Павал Вінаградаў, узяты пад варту, абвінавачаны па арт. 367 і 130 КК за паклёп на А.Лукашэнку і распальваньне варожасьці да сацыяльных групаў;
  8. Аляксандар Цымбаліст, узяты пад варту, абвінавачаны па арт. 369 і 130 КК за абразу прадстаўніка ўлады і распальваньне варожасьці да сацыяльных групаў (так званая «справа Зэльцэра»).

Агулам на 28 сьнежня беларускія праваабаронцы палітычнымі зьняволенымі лічаць ужо 962 чалавекі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG