Пра гэта ў нядзелю паведаміў прэзыдэнт ПАР Сірыл Рамафоса.
Туту — адзін з самых вядомых барацьбітоў з апартэідам — рэжымам праўленьня белай меншасьці ў ПАР, які існаваў з канца 1940-х да 1994 года. Ён быў першым чарнаскурым выкладчыкам англіканскай сэмінарыі ў краіне, першым чарнаскурым біскупам Ёханэсбурга, узначальваў Паўднёва-афрыканскую раду цэркваў і Усеафрыканскую канфэрэнцыю цэркваў.
Патрабуючы ад сусьветнай супольнасьці ўзмацніць ціск на паўднёваафрыканскія ўлады, ён адначасова заклікаў да міжкультурнага і міжрасавага дыялёгу ўнутры краіны. І актыўна адстойваў дэмакратычныя каштоўнасьці, асабіста прымаючы ўдзел у дыялёгу аб перадачы ўлады ўраду, які прадстаўляе ўсё насельніцтва.
Пасьля дэмантажу апартэіду біскуп узначальваў Камісію праўды і прымірэньня, створаную для расьсьледаваньня палітычна матываваных злачынстваў часоў расавай сэгрэгацыі. Яна амніставала прыкладна дзясятую частку абвінавачаных у палітычных злачынствах.
«Сьмерць арцыбіскупа Туту — яшчэ адна сумная глава ў разьвітаньні нашай нацыі з пакаленьнем выдатных паўднёваафрыканцаў, якія завяшчалі нам вызваленую Паўднёвую Афрыку», — сказана ў заяве прэзыдэнта Рамафосы на яго афіцыйным сайце.
Туту памёр праз некалькі тыдняў пасьля сьмерці ва ўзросьце 85 гадоў Фрэдэрыка дэ Клерка, апошняга прэзыдэнта Паўднёвай Афрыкі пры апартэідзе і ключавога гульца ў пераходзе краіны да дэмакратыі.
Дэ Клерк атрымаў Нобэлеўскую прэмію міру разам з Нэльсанам Мандэлай у 1993 годзе.
