Лінкі ўнівэрсальнага доступу

36% беларусаў эканомяць на ежы, — вынікі апытаньня BEROC


Ілюстрацыйнае фота

Каб замерыць успрыманьне беларускай эканомікі насельніцтвам краіны, Беларускі эканамічны дасьледча-адукацыйны цэнтар BEROC правёў апытаньне спажыўцоў і бізнэсу ў рамках праекту «Маніторынг эканомікі Беларусі», вынікі якога эканамісты прэзэнтавалі 21 сьнежня.

Выданьне Deutsche Welle публікуе вынікі апытаньня, агучаныя на прэзэнтацыі.

Кацярына Барнукова
Кацярына Барнукова

Як распавяла дырэктарка BEROC Кацярына Барнукова, 38% рэспандэнтаў сярод гарадзкога насельніцтва ва ўзросьце 18–64 гадоў адказалі, што адчуваюць падзеньне даходаў. Пры тым яна адзначыла, што гэта нізкі паказьнік — значна меншы, чым было летась на хвалі пандэміі каранавірусу — і ён добра адлюстроўвае бягучую сытуацыю ў эканоміцы.

У асноўным беларусы адмаўляюцца ад буйных пакупак і забаваў, а 36,4% апытаных вымушаныя эканоміць на ежы.

Таксама эканамісты вызначылі індэкс спажывецкай упэўненасьці: −25% (для параўнаньня, гэта ніжэй, чым у Расеі, дзе −19%).

«У адказах на пытаньні, зьвязаныя з эканамічным станам краіны, значна больш нэгатыву. Пераважная большасьць рэспандэнтаў кажа, што эканамічная сытуацыя ў краіне пагоршылася альбо хутчэй пагоршылася», — кажа Кацярына Барнукова.

Беларускі малы і сярэдні бізнэс, у сваю чаргу, да будучыні ставіцца нэўтральна, распавёў на прэзэнтацыі Маніторынгу эканаміст цэнтру BEROC Леў Львоўскі:

Леў Львоўскі
Леў Львоўскі

«Пазытыўна на актуальнае становішча і будучыню глядзяць прадстаўнікі прамысловасьці, а пэсымістамі можна назваць бізнэс, які працуе ў будаўніцтве. На гандаль уплывае высокая няпэўнасьць будучыні». Акрамя таго, як растлумачыў Львоўскі, апытаньне паказала моцныя інфляцыйныя чаканьні. Таксама бізнэс даволі высока ацэньвае рызыкі працы ў Беларусі.

Эканамісты прагназуюць спад беларускай эканомікі

У цэлым, гаворачы аб будучыні беларускай эканомікі, Кацярына Барнукова адзначыла высокую ступень нявызначанасьці і зьвярнула ўвагу, што Беларусь вельмі залежыць ад таго, што адбываецца з асноўнымі гандлёвымі партнэрамі і ўвогуле ў сьвеце.

«Пры самым станоўчым сцэнары мы ўбачым рост у 1% ВУП. Але калі санкцыі запрацуюць як трэба — рост будзе нулявым ці нават −1%, гэта рэалістычны сцэнар. Горш, гэта значыць −2%, наўрад ці будзе, бо Расея працягне руку дапамогі і зьмякчыць эфэкт санкцыяў», — кажа Барнукова.

Вадзім Іосуб
Вадзім Іосуб

Эканаміст Вадзім Іосуб, словы якога прыводзіць DW, у ацэнках больш пэсымістычны: «Пры адсутнасьці рэформаў сам патэнцыял росту беларускай эканомікі нізкі, каля 1%. Гэта ніжэй, чым ва ўсіх суседзяў, і ганебна ніжэй, чым у разьвіцьцёвых краін, да якіх адносіцца Беларусь. А калі да гэтага сьціплага патэнцыялу дадаць санкцыі, то ВУП зьнізіцца ад −1 да −3%».

Акрамя таго, паводле экспэртаў, на беларускую эканоміку ня можа не ўплываць палітычны крызіс у краіне, які правакуе падзеньне інвэстыцыяў і рост няпэўнасьці. Яшчэ адзін фактар, ад якога залежыць траекторыя эканомікі, — магчымасьць рэфінансаваць даўгі, калі з патэнцыйных крэдытораў у Беларусі засталася толькі Расея.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG