Лінкі ўнівэрсальнага доступу

«Шалёная жорсткасьць беларускай судовай сыстэмы». «Рэпартэры бяз межаў» запатрабавалі вызваліць Лосіка і Пальчыса


Неадкладна вызваліць асуджаных на працяглыя тэрміны пазбаўленьня волі блогераў Ігара Лосіка і Эдуарда Пальчыса запатрабавала ад «беларускага рэжыму» міжнародная праваабарончая арганізацыя «Рэпартэры бяз межаў».

Вынесеныя ім выракі ў заяве названыя «выключна суровымі»:

«17 сьнежня ў Менску ў выніку пародыі на судовы працэс быў прыгавораны да 13 гадоў пазбаўленьня волі блогер Эдуард Пальчыс. Пасьля 15 месяцаў папярэдняга зьняволеньня ён быў прызнаны вінаватым у распальваньні варожасьці групай асоб, арганізацыі масавых беспарадкаў, арганізацыі дзеяньняў, якія парушаюць грамадзкі парадак, і за заклікі да дзеяньняў, накіраваных на прычыненьне шкоды нацыянальнай бясьпецы.

Трыма днямі раней у Гомлі (...) 15 гадоў пазбаўленьня волі прысудзілі кансультанту Радыё Свабода Ігару Лосіку. Ён правёў у папярэднім зьняволеньні 18 месяцаў і быў асуджаны разам з іншымі палітвязьнямі за арганізацыю масавых беспарадкаў і распальваньне сацыяльнай варожасьці падчас аднаго з самых працяглых у гісторыі Беларусі судовых працэсаў, які доўжыўся 173 дні. Абодва слуханьні праходзілі за зачыненымі дзьвярыма, каб, па словах суду, «не дапусьціць распаўсюду экстрэмісцкіх матэрыялаў», — зазначаюць «Рэпартэры бяз межаў».

«Гэтыя вынесеныя ў выніку несправядлівых судовых працэсаў выракі зьяўляюцца самымі суровымі з тых, якія беларуская судовая сыстэма вынесла работнікам СМІ ў адыходзячым годзе», — заявіла кіраўніца аддзелу Ўсходняй Эўропы і Цэнтральнай Азіі арганізацыі Жанна Кавелье.

На яе думку, «шалёная жорсткасьць беларускай судовай сыстэмы і беспрэцэдэнтная суровасьць гэтых двух выракаў не прадвяшчаюць нічога добрага для свабоды прэсы ў краіне ў 2022 годзе».

«Беларусь, чый дзяржаўны апарат без ваганьняў зьдзекуецца і катуе журналістаў у турмах, займае ў сусьветным індэксе свабоды прэсы за 2021 год 158-е месца са 180», — зазначаецца ў заяве.

Крымінальны перасьлед Ігара Лосіка

На адміністратара суполкі «РБ головного мозга» і фрылансэра-кансультанта Радыё Свабода Ігара Лосіка завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).

Лосіка затрымалі 25 чэрвеня 2020 года пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.

Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.

15 сьнежня пасьля выстаўленьня другога абвінавачаньня Ігар Лосік абвясьціў галадоўку пратэсту і трымаў яе да 25 студзеня.

11 сакавіка 2021 года Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.

Па якім артыкуле Лосіку выставілі новыя абвінавачаньні, невядома. Ягоны адвакат Дзьмітрый Лепрэтар пад падпіскай аб неразгалошваньні.

Дома Ігара чакаюць жонка і двухгадовая дачка. Жонка прыяжджала да месца закрытага суду і дзяжурыла каля будынку, нават ня маючы шанцаў зайсьці і пабыць на працэсе.

14 сьнежня ў будынку СІЗА-3 ў Гомлі судзьдзя Мікалай Доля вынес выракі 6 падсудным:

  • Ігару Лосіку прысудзілі 15 гадоў зьняволеньня,
  • Арцёму Сакаву — 16 гадоў,
  • Міколу Статкевічу — 14 гадоў,
  • Дзьмітрыю Папову — 16 гадоў,
  • Сяргею Ціханоўскаму — 18 гадоў,
  • Уладзімеру Цыгановічу — 15 гадоў зьняволеньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG