Лінкі ўнівэрсальнага доступу

Палітзьняволеная Натальля Хершэ пра разрыў адносін з мужам: «Часам у Бога для цябе зусім іншы сцэнар»


Натальля Хершэ

У канцы верасьня Натальлю Хершэ перавялі ў мужчынскую турму ў Магілёве. «Наша Ніва» даведалася пра ўмовы там, ейнае здароўе і тое, як жанчына перажыла асабістую драму.

«Ня буду больш нічога купляць зь ежы, бо гэта бессэнсоўна»

Натальля сядзіць адна ў шасьцімеснай камэры. Кожны дзень можа выходзіць на гадзінны шпацыр у дворык і рабіць фізычныя практыкаваньні. Зь яе словаў, стаўленьне адміністрацыі да яе тут лепшае, чым у гомельскай калёніі.

Раней Натальля распавядала, што ў яе моцна выпадаюць валасы. Цяпер сытуацыя не такая крытычная.

«Ёй правялі дасканалае мэдыцынскае абсьледаваньне, цэлы дзень вазілі па вузкіх спэцыялістах. І прызначылі гарманальныя лекі, замяшчальную тэрапію, якая ёй неабходная», — кажа брат Генадзь.

Апошні раз сястра тэлефанавала яму 30 лістапада. Усе спатканьні зь ёй забаранілі да траўня. Бандэролі забаранілі да чэрвеня.

«Гэта той шлейф пакараньняў, які цягнецца з гомельскай калёніі, — тлумачыць ён. — Мне вярнулася 22-кілаграмовая пасылка з рэчамі — яе не прынялі. Даслалі пісьмовы адказ, што наступную можна адправіць не раней за канец траўня».

Атаварвацца ў турэмнай краме Натальля можа толькі на 29 рублёў у месяц (адну базавую велічыню).

«Яна неяк купіла сыру, марской капусты. Каб яны не сапсаваліся, у торбачцы вывесіла іх за акенца. Прыйшлі супрацоўнікі, сказалі, што так трымаць прадукты забаронена, і давялося выкінуць іх. Кажа: «Ня буду больш нічога купляць з ежы, бо гэта бессэнсоўна, няма ўмоў для захоўваньня».

Гэтыя дробязі, якія ня робяць яе знаходжаньне там камфортным, канечне, крыху псуюць настрой. Але яна не губляе аптымізму і сілы духу. Піша: «Усё гэта нічога, галоўнае — выстаяць, дачакацца».

«У мяне ўжо гэта адбалела»

Муж Натальлі Робэрт, які жыве ў Швайцарыі, напісаў ёй, што хоча расстацца зь ёй.

«Нядаўна мне прысьніўся сон, зьвязаны з Робэртам. Калі я прачнулася, прааналізавала яго, мне стала раптам усё ясна: часам у Бога падрыхтаваны для цябе зусім іншы сцэнар, і ты павінен праявіць мудрасьць і зьмірэньне, прыняць яго без душэўных перажываньняў.

Ён можа моцна адрозьнівацца ад тваіх уяўленьняў і жаданьняў, але ён і ёсьць слушны для цябе. Безумоўна, нейкі час усё ж неабходны, каб гэта заключэньне ўкаранілася ў тваёй сьвядомасьці», — пісала яна ў лісьце брату.

Са словаў Натальлі, яна пакутавала ад разрыву з мужам цягам месяца.

«А потым прыйшла да высновы, што ўсё, што робіцца, так і патрэбна. „Я павінна ўзяць гэты жыцьцёвы ўрок і ісьці далей“», — пераказвае словы сястры Генадзь.

Муж спрабаваў зьвязацца з Натальляй празь некалькі тыдняў, пераасэнсаваў свой учынак і сумаваў па жонцы, даслаў ёй два лісты. Прасіў, каб яна даравала яму, бо ён ня можа безь яе.

«Натальля ў тэлефоннай размове са мной была катэгарычная: „Гена, у мяне ўжо гэта адбалела“. Я ведаю ейны характар — жорсткі, просталінейны. Але я б хацеў, каб яна ўсё ж даравала. Бо ў першы год, самы цяжкі, Робэрт шмат для яе зрабіў. І ўсё ж прыйшоў да высновы, што па-ранейшаму яе кахае», — кажа брат Натальлі Хершэ.

Хто такая Натальля Хершэ:

Палітзьняволеную грамадзянку Швайцарыі Натальлю Хершэ пакаралі пазбаўленьнем волі на 2,5 года ў калёніі агульнага рэжыму. Такі прысуд вынес 7 сьнежня мінулага году суд Савецкага раёну Менску. Яе абвінавацілі ў «супраціве з гвалтам».

На жаночым маршы 19 верасьня 2020 году ў Менску Натальля Хершэ сарвала балаклаву з 22-гадовага амапаўца Сяргея Кончыка. Суд прысудзіў таксама, каб Натальля сплаціла пацярпеламу 1000 рублёў кампэнсацыі.

Натальля Хершэ
Натальля Хершэ

Натальля Хершэ не прызнала сябе вінаватай у тым, што брала ўдзел у несанкцыянаванай акцыі і нанесла драпіну амапаўцу, калі здымала балаклаву.

На агучваньні прысуду Натальля была ў вопратцы белага і чырвонага колераў.

У сакавіку 2021 году Натальлю Хершэ перавялі ў жаночую калёнію № 4 у Гомлі. Натальля скардзілася на ўмовы ўтрыманьня і дасылала на волю малюнкі сваіх сукамэрніц.

За адмову шыць форму для сілавікоў яе зьмясьцілі ў ШЫЗА, а потым перавялі ў ПКТ (памяшканьне камэрнага тыпу). У канцы верасьня 2021 году суд вырашыў перавесьці яе ў турму.

Натальля Хершэ тройчы адмаўлялася ад прапаноў напісаць заяву аб памілаваньні на імя Аляксандра Лукашэнкі, бо лічыць сябе невінаватай.

Міністар замежных спраў Швайцарыі запатрабаваў ад уладаў Беларусі вызваліць Натальлю Хершэ.

Амбасадар Шавйцарыі Клёд Альтэрмат наведвае Натальлю ў калёніі.

51-гадовая Натальля Хершэ мае беларускае і швайцарскае грамадзянства, нарадзілася ў Воршы, але цягам апошніх 12 гадоў стала жыла ў Санкт-Галене, у Швайцарыі. Там жывуць яе дзеці — 23-гадовая Вiялета і 27-гадовы Хведар. Дачка вучыцца ва ўнівэрсытэце Цюрыху, але цяпер вымушана была ўзяць акадэмічны адпачынак.

Бацькі Натальлі Хершэ
Бацькі Натальлі Хершэ

Бацькі Натальлі памерлі ад анкалёгіі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG