Лінкі ўнівэрсальнага доступу

ByPol: у МУС Беларусі будзе скарачэньне 50% цэнтральнага апарату і адстаўка Кубракова


Іван Кубракоў
Іван Кубракоў

Паводле ініцыятывы былых сілавікоў, некамплект супрацоўнікаў МУС агулам у краіне дасягнуў 25%.

Паводле інфармацыі ініцыятывы ByPol, сытуацыя ў Міністэрстве ўнутраных справаў блізкая да драматычнай. Дэфіцыт супрацоўнікаў, нягледзячы на вонкавы спакой, складае ўжо 25%, а ў асобных РАУС да 50%.

«У адным са сваіх расьсьледаваньняў мы згадвалі, што міністар Кубракоў атрымаў загад да 1 студзеня ачысьціць ад „нядобранадзейных“ шэрагі АУС , у тым ліку цэнтральнага апарату міністэрства. Нам дакладна вядома, што гэтыя сьпісы ўжо падрыхтавалі і яны гатовыя да рэалізацыі. У адным толькі цэнтральным апараце пры яго штатнай колькасьці амаль у 1000 чалавек звальненьню падлягаюць больш за 500 супрацоўнікаў».

Пасьля апублікаваньня гэтых плянаў ініцыятывай ByPol МУС быццам адклала скарачэньні да рэфэрэндуму аб зьмене Канстытуцыі, які плянуе правесьці Лукашэнка.

«Практычна вырашана пытаньне і аб самім міністру Кубракову, які дапусьціў „фатальную“ памылку, паспрабаваўшы запярэчыць рашэньню звольніць больш як 50% супрацоўнікаў цэнтральнага апарату, якія адступілі ад вернасьці дыктатару . На пасадзе міністра ўнутраных справаў апошняга павінен зьмяніць яго першы намесьнік — Назаранка, той самы, што камандаваў унутранымі войскамі ў пэрыяд беспрэцэдэнтна жорсткага здушэньня мірных пратэстаў 2020 году», — піша ініцыятыва.

Што такое ініцыятыва ByPol

У ініцыятыву ByPol уваходзяць былыя і цяперашнія працаўнікі сілавых структур, нязгодныя з гвалтам, фальсыфікацыямі і масавымі рэпрэсіямі, якія ўзмацніліся ў Беларусі пасьля выбараў 2020 году.

Згодна са справаздачай на тэлеграм-канале ByPol, унутраныя дакумэнты сілавых структур у офіс арганізацыі паступаюць штодня. Асаблівая ўвага надаецца супрацоўніцтву зь дзейнымі сілавікамі, якія сьвядома дапамагаюць апанэнтам рэжыму.

Як вынік, ByPol рэгулярна публікуе сакрэтныя ведамасныя ўказы і аўдыёзапісы перамоваў высокіх чыноў сілавога блёку (напрыклад, экс-старшыні КДБ Вадзіма Зайцава, былога начальніка ГУБАЗіК Мікалай Карпянкова ды іншых).

Iніцыятыва аб’ядноўвае былых беларускіх сілавікоў, уключна з супрацоўнікамі Камітэту дзяржбясьпекі, Апэратыўна-аналітычнага цэнтру, Службы бясьпекі прэзыдэнта ды іншых структураў.

У красавіку 2021 суд Чыгуначнага раёну Гомля прызнаў Telegram-канал ByPol экстрэмісцкім. 8 лістапада 2021 суд вызнаў ByPol і распрацаваны ініцыятывай мабілізацыйны плян «Перамога» «экстрэмісцкімі фармаваньнямі».

У чэрвені 2023 году ByPol раскалоўся, удзельнікі нутранога канфлікту паспрачаліся паміж сабой, у выніку спатрэбілася ўрэгуляваньне пры дапамозе АПК. Пасьля перамоваў бакоў з удзелам Сьвятланы Ціханоўскай ініцыятыва падзялілася на фонд ByPol і аб’яднаньне BelPol.

BelPol стаў праваўладальнікам «тэхнічных і інтэлектуальных магчымасьцяў і інструмэнтаў» першапачатковай арганізацыі. У сваю чаргу, фонд, які ўзначальвае Аляксандар Азараў, захаваў толькі юрыдычную назву ByPol і плян «Перамога».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG