Лінкі ўнівэрсальнага доступу

У санкцыйны сьпіс ЭЗ трапяць турфірмы, якія дапамагаюць мігрантам на польска-беларускай мяжы


Эўрапейскі зьвяз прапануе ўнесьці ў санкцыйны сьпіс турыстычныя кампаніі, якія спрыяюць патоку мігрантаў на мяжы Беларусі з Польшчай, паведаміла ў аўторак агенцтва Bloomberg са спасылкай на адпаведны дакумэнт.

«ЭЗ прапануе ўнесьці ў „чорны сьпіс“ турфірмы, якія дапамагаюць патоку мігрантаў», — інфармуе агенцтва.

Паводле яго зьвестак, Брусэль зьбіраецца ўжо ў аўторак апублікаваць «прапанову, накіраваную на Беларусь».

Напярэдадні эўракамісар Олівэр Вархэі заявіў, што ЭЗ вядзе працу над далейшымі спосабамі адказу на сытуацыю зь мігрантамі на польска-беларускай мяжы і абвесьціць пра іх на гэтым тыдні.

«Мы працуем над спосабамі актывізацыі нашага адказу мэтанакіраваным і эфэктыўным чынам. Іх вам трэба чакаць ад нас на гэтым тыдні», — паведаміў Вархэі на супольнай прэс-канфэрэнцыі з канцлерам Аўстрыі Аляксандрам Шаленбэргам і лідэрам беларускай апазыцыі Сьвятланай Ціханоўскай.

ЭЗ раней мадыфікаваў санкцыйны рэжым супраць Беларусі, зрабіўшы магчымым увядзеньне абмежаваньняў у адказ на міграцыйны крызіс.

На мінулым тыдні кіраўнікі МЗС краін ЭЗ узгаднілі пяты пакет санкцый у дачыненьні да рэжыму Лукашэнкі ў сувязі зь міграцыйным крызісам на мяжы Беларусі з Польшчай.

Санкцыі Эўразьвязу супраць рэжыму Лукашэнкі

Эканамічныя сэктаральныя санкцыі

Эканамічныя сэктаральныя санкцыі былі ўведзеныя Эўразьвязам пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф'і Сапегі, а таксама з прычыны парушэньняў правоў чалавека і рэпрэсій.

У матывацыйнай частцы прынятага рашэньня прыгадваюцца, у прыватнасьці, эскаляцыя сур’ёзных парушэньняў правоў чалавека ў Беларусі і жорсткія рэпрэсіі супраць грамадзянскай супольнасьці, дэмакратычнай апазыцыі і журналістаў, а таксама асобаў, якія належаць да нацыянальных меншасьцяў.

24 чэрвеня 2021 году Эўразьвяз увёў наступныя абмежавальныя захады:

  • У экспарце і перадачы абсталяваньня, тэхналёгіяў або праграмнага забесьпячэньня, прызначанага для выкарыстаньня ў інтарэсах беларускіх уладаў у маніторынгу або перахопе Інтэрнэту і тэлефоннай сувязі на мабільных або стацыянарных прыладах.
  • У экспарце ў Беларусь тавараў падвойнага прызначэньня для вайсковага выкарыстаньня.
  • У экспарце ў Беларусь тавараў, якія выкарыстоўваюцца для тытунёвых вырабаў.
  • У імпарце ў ЭЗ нафтапрадуктаў з Беларусі.
  • У імпарце ў ЭЗ калійных угнаеньняў з Беларусі,
  • У доступе на фінансавыя рынкі ЭЗ ўраду Беларусі, а таксама беларускім дзяржаўным фінансавым інстытутам і субʼектам.
  • Эўрапейскаму інвэстыцыйнаму банку забаронена фінансаваць праекты ў дзяржаўным сэктары Беларусі.

Санкцыі супраць асобаў і прадпрыемстваў

Раней, на пасяджэньні ў Люксэмбургу 21 чэрвеня 2021 году, міністры замежных спраў Эўразьвязу зацьвердзілі чацьвёрты пасьля прэзыдэнцкіх выбараў 2020 году ў Беларусі пакет санкцый супраць беларускага рэжыму.

Санкцыйны сьпіс з 78 чалавек і 8 арганізацый, якім замарожваюцца актывы і забараняецца выдача візаў у Эўразьвяз, быў апублікаваны ў афіцыйным часопісе Эўразьвязу, такім чынам ён набывае моц.

Яшчэ раней, у кастрычніку, лістападзе і сьнежні 2020 году Эўразьвяз увёў тры пакеты санкцый супраць уладаў Беларусі. Абмежавальныя захады тычацца афіцыйных асобаў, а таксама некаторых прадпрыемстваў. Агулам у санкцыйным сьпісе тады апынуліся 84 асобы, якім забаронены ўезд у краіны ЭЗ. У сьпіс уваходзіць Аляксандар Лукашэнка, ягоны сын Віктар Лукашэнка, кіраўніца ЦВК Лідзія Ярмошына, старшыня КДБ Іван Тэртэль, старшыня Сьледчага камітэту Іван Наскевіч, генэральны пракурор Андрэй Швед і іншыя сілавікі, а таксама судзьдзі і чальцы выбарчых камісіяў.

Сярод іншага, ЭЗ увёў санкцыі супраць юрыдычных асобаў: ЗАТ «Белтэхэкспарт», «Дана Холдынгз/Дана Астра», Кіраўніцтва справаў прэзыдэнта Беларусі, ТАА «Сінэзіс», ААТ «АГАТ — электрамэханічны завод», ААТ «140-ы рамонтны завод» і ААТ «Менскі завод колавых цягачоў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG